Доннарумма атрофида катта ўйин: "Челси", "Сити" ва "Бавария" бир майдонда

Европа футболида ёзги трансфер ойнаси қизғин паллага кирди. Эътибор марказида турган қаҳрамонлардан бири – Парижнинг машҳур клуби ПСЖда фаолият олиб бораётган ва Италия термаси шарафини ҳимоя қилувчи тажрибали дарвозабон Жанлуижи Доннарумма.

Сўнгги хабарларга кўра, унинг хизматларига нафақат “Челси”, балки Европа футболида ўз ўрнига эга бўлган яна икки таниқли клуб – “Манчестер Сити” ва “Бавария” ҳам жиддий қизиқиш билдира бошлади, деб хабар берди инсайдер Николо Скира ўзининг Х ижтимоий тармоғида.

Маълумотларга кўра, ҳар учала жамоа ҳам Доннарумманинг ПСЖ билан амалдаги шартномаси 2026 йилга қадар давом этишига қарамасдан, унинг атрофидаги вазиятни диққат билан кузатмоқда. Чунки шартномани узайтириш борасида ҳозирча ҳеч қандай аниқлик мавжуд эмас. Бу эса клублар учун имконият эшигини очадиган ҳолат.

Ҳозирча Доннарумманинг ўзи ҳам, ПСЖ раҳбарияти ҳам бирон расмий таклиф олмаган ёки беришмаган. Бироқ футбол оламида тез ўзгарадиган вазиятлар ва клубларнинг мустаҳкам посбонга бўлган эҳтиёжи бу трансферга йўл очиши мумкин.

Transfermarkt портали маълумотига кўра, 26 ёшли Италиялик дарвозабоннинг трансфер баҳоси ҳозирда 40 миллион евро атрофида баҳоланмоқда. Доннарумма 2024/25 мавсуми давомида ПСЖ сафида 47 ўйинда майдонга тушди, 43 та гол ўтказиб юборди ва 17 учрашувда ўз дарвозасини голсиз сақлашга муваффақ бўлди. Бу натижалар унинг даражасини яна бир бор тасдиқлайди.

Мазкур рақамлар ва унинг тажрибаси эътиборга олинганда, Доннарумма Европа гранди бўлишга муносиб номзод эканлиги шубҳасиз. Айниқса, “Челси” янги даврда мустаҳкам дарвозабон излаётган бир пайтда, “Сити”да Эдерсоннинг келажаги мавҳум бўлиб қолаётган, “Бавария” эса Нойердан кейинги авлодни шакллантиришни режалаштираётган бир вақтда – Доннарумма трансфери улар учун жуда муҳим ва стратегик қарорга айланиши мумкин.

Футбол ишқибозлари энди Доннарумманинг тақдири қандай ҳал этилишини қизиқиш билан кутмоқда. У Парижда қоладими ёки янги даъватлар йўлида қарор қабул қиладими – буни яқин кунлар кўрсатади. Яхши дарвозабон учун кураш эса энди бошланди, десак муболаға бўлмайди. «Замин»ни Telegram’да ўқинг!