Файзуллаев Туркияга йўл олмоқда: янги чақириқ, баҳсли фикрлар ва рекорд сумма

Яна бир ўзбекистонлик футболчи Европа йўлида навбатдаги қадамни ташламоқда. Туркиянинг “Истанбул Башакшеҳир” клуби ва Россиянинг ЦСКА жамоаси 21 ёшли яримҳимоячи Аббосбек Файзуллаевнинг трансфери борасида тўлиқ келишувга эришди, деб хабар берди туркиялик журналист Осман Алтунтерим ўз манбаларига асосланиб.

Маълумотларга кўра, армиячилар клуби ушбу йигит учун 7 миллион евро ишлаб олади ва бу сумма ўзбекистонлик футболчиларнинг Европа трансферларида энг йириклардан бири ҳисобланади. Файзуллаев 2023 йилдан буён ЦСКА сафида ўйнаётган эди ва ўтган мавсум жамоаси билан Россия Кубоги ҳамда Суперкубогини қўлга киритишга улгурди.

2024/25 йилги мавсумда Аббосбек барча мусобақаларда 39 та ўйинда майдонга тушиб, 3 та гол урди ва 8 та голли узатма берди. Ундан олдинроқ, у икки йил аввал “Пахтакор”дан ЦСКАга 500 минг еврога кўчиб ўтган, москва клуби билан 2026 йилгача шартнома имзолаганди. Шу вақтга қадар ЦСКА таркибида 72 та ўйинда 8 та гол ва 22 та ассистга эга бўлди.

Бироқ, Россия футболи ветерани Владимир Пономарёвнинг фикрича, Файзуллаев Туркия чемпионатида юқори даража кўрсата олмайди. «Файзуллаев кетаверсин. У Туркия чемпионатига дош беролмайди, у жуда кичик. У аввал рақиб жарима майдончасигача кирарди, рақибларни дриблингда алдаб ўтиб, зарба бера оларди, энди эса шунчаки дам олмоқда.

Файзуллаев ҳозир «чаққон супурги», унинг ўйинида янгиликлар йўқ. Яримҳимоячи сифатида у нолга тенг, боши билан ўйнамайди. У Европа учун етарли даражада яхши эмас, Туркияда эса фақат ўртамиёна жамоаларга мос.

Уни «арзон мураббо» дейиш мумкин, аммо «чаққон супурги» кўпроқ мос келади», — деди Пономарёв «Советский спорт» нашрига.

Шу билан бирга, мутахассиснинг сўзлари жамоатчиликда турли муносабатларни уйғотмоқда. Аббосбек Файзуллаевнинг Туркия чемпионатида ўз сўзини айта олиши ёки ёшининг асосий устунлигига айланишини вақт кўрсатади.

Эслатиб ўтамиз, айни пайтда “Истанбул Башакшеҳир” сафида яна бир ўзбекистонлик футболчи — Элдор Шомуродов ҳам фаолият олиб бормоқда. У жорий мавсум “Рома”дан сотиб олиш ҳуқуқи билан ижара асосида келган эди ва турк клуби ундан катта умид қилаётгани маълум.

Ўзбекистон футболининг ёш юлдузлари учун Туркиядаги янги имкониятлар ва чегаралар – бу фақатгина шахсий тараққиёт эмас, балки миллий спортимиз обрўси учун ҳам муҳим синов ҳисобланади. Мухлислар эса энди фақат вақтни кутмоқда – Файзуллаев Туркияда ўз сўзини айта оладими ёки Пономарёвнинг танқиди ҳақли чиқадими? «Замин»ни Telegram’да ўқинг!