ЎФА катта мураббий изламоқда: Славен Билич номзоди ва музокаралар

Ўзбекистон футбол ассоциацияси миллий терма жамоа бош мураббийлиги учун яна халқаро даражадаги мутахассисларга мурожаат қилишда давом этмоқда. Сўнгги хабарларга кўра, ассоциация Англия премьер-лигасидаги иши билан ном қозонган хорватиялик тажрибали мураббий Славен Биличга расман таклиф билан чиққан, деб хабар берди championat.asia.

Айни пайтда, Славен Билич ва ЎФА расмийлари ўртасида музокаралар қизғин тус олган. Маълумотларга кўра, 56 ёшли хорват мутахассисига миллий жамоани тубдан янгилаш ва халқаро аренада янги натижаларга эришиш вазифалари юклатилиши мумкин. Эътиборлиси, Биличнинг сўнгги иш жойи Саудия Арабистонидаги “Ал Фатиҳ” клуби бўлиб, у ердан 2024 йил август ойида кетганидан буён ҳеч қаерда фаолият олиб бормаган.

Славен Билич мураббийлик фаолияти давомида турли давлатлардаги нуфузли клубларни бошқарган. Жумладан, “Хайдук”, “Локомотив” Москва, “Бешиктош”, “Вест Хэм”, “Ал Иттиҳод”, “Вест Бромвич”, “Бэйцзин Гоань”, “Уотфорд” ва бошқа жамоаларда тажриба орттирган. Унинг асосий ютуқлари сифатида Хорватия билан Европа чемпионати чорак финалига чиқиши, Туркияда икки марта бронза медалига эга бўлиши ва миллий чемпионатда вице-чемпионликка эришганини қайд этиш мумкин.

Эслатиб ўтамиз, бундан олдинроқ ЎФА яна бир катта ном — Германия терма жамоаси собиқ мураббийи Йоахим Лёвга таклиф билан чиққани маълум бўлган эди. Орадан кўп ўтмай Лёвнинг ўзи ҳам ушбу таклиф ҳақида расман тасдиқ берган.

ЎФАнинг юқори амбициялари ва янги стратегияси миллий футболда янги саҳифа очиши кутилмоқда. Қолаверса, мухлислар ва экспертлар ҳам катта умид ва қизиқиш билан музокаралар натижасини кутмоқда. Терма жамоа бош мураббийлигида қандай ўзгариш бўлиши — яқин кунларда аниқ бўлади. «Замин»ни Telegram’да ўқинг!