“Челси” АПЛда ғолиб бўлади – Вьерининг кутилмаган башорати

Вьери “Челси” ҳақида қатъий гапирди – ғолиб ким бўлади?

Европа футболида номи афсонага айланган италиялик собиқ ҳужумчи Кристиан Вьери “Челси” клуби ҳақида жиддий фикр билдирди. Унинг таъкидлашича, Лондон клуби келаётган мавсумда Англия Премьер Лигасининг асосий ғолибига айланиши мумкин. Унинг бу гаплари футбол жамоатчилиги орасида катта қизиқиш уйғотди, деб хабар берди La Gazzetta dello Sport.

“Сўнгги ойларда жамоа доимий равишда ғалаба қозонаётганини кузатдим. Бу футболчиларнинг ўзига бўлган ишончини жуда кучайтирди. ПСЖ билан бўлган финалда уларнинг устун келиши ҳам бежиз эмас. Мен аввал ПСЖ катта кучга эга, деб ўйлаган эдим. Лекин майдонда барчаси ўзгарди”, – деди Вьери.

Унинг сўзларига кўра, Энцо Мареска нафақат кучли мураббий, балки жиддий тактик ва психологик тайёргарликка эга етакчи. Бу йўлда у бир неча йиллар давомида Пеп Гвардиола билан ишлаган ва бу албатта, унинг услубида сезилиб турибди.

“Мареска фақат юқори прессинг орқали натижа қилаётгани йўқ. У жамоани тўп билан ҳаракат қилишга, вазиятларни оқилона ташкил этишга ва интизомга ўргатган. “Челси” ҳозир нафақат жисмонан, балки руҳан ҳам кучли жамоага айланган”, – деб қўшимча қилди Вьери.

Унинг фикрича, келаси мавсумда “Челси” нафақат Англия чемпионлиги учун, балки Европа чемпионлар лигаси бош соврини учун ҳам жиддий курашчига айланади.

Бундай фикрлар албатта, мухлислар ва экспертлар ўртасида тортишувларга сабаб бўлади. Аммо бир нарса аниқ – “Челси” Мареска қўлида жиддий кучга айланмоқда ва уни энди ҳеч ким инкор этолмайди.

Мухлислар эса энди ёзги трансферлар ва янги мавсумни интизорлик билан кутмоқда. Улар учун эса энг қизиқарлиси – Вьерининг башорати қанчалик рост чиқади? «Замин»ни Telegram’да ўқинг!