Пеналтисиз голлар бўйича Месси янги эра бошлади: Роналду ортда

Янги статистика, янги тарих — футбол олами яна бир рекордга гувоҳ бўлди: “Интер Майами”нинг 38 ёшли аргентиналик сардори Лионель Месси пеналтисиз урилган голлар сони бўйича дунё рекордини янгилади, деб хабар берди mlssoccer.com. У бу кўрсаткичда узоқ йиллардан бери рақобат қилиб келаётган португалиялик Криштиану Роналдуни ортда қолдирди ва янги стандарт ўрнатди.

20 июль куни МЛС доирасидаги “Нью-Йорк Ред Буллз”га қарши учрашув футбол тарихида муҳим кунлардан бири бўлиб қолди. “Интер Майами” рақибини сафарда 5:1 ҳисобида мағлуб этди ва ушбу беллашувда Месси том маънода ҳақиқий лидер эканини яна бир бор намойиш қилди. У 2 та гол урди ва 1 та ассист билан ажралиб турди. Қувонарлиси, ҳар икки гол ҳам пеналтисиз, ўйин шароитида киритилди.

Шу тариқа, Лионель Месси профессионал фаолияти давомида пеналтисиз киритилган голлар сонини 764 тага етказди. Португалиялик супер юлдуз Криштиану Роналду эса бу кўрсаткич бўйича ҳозирча 763 та билан иккинчи ўринда қолди. Рақобат анча шиддатли бўлгани, бу натижа икки футболчининг ўзаро курашида янги босқични бошлаганини англатади.

Умуман, Месси 1114 та расмий ўйинда 874 та гол урган, улардан 110 таси пеналтидан. Роналду эса 1281 учрашувда 938 марта рақиб дарвозасини ишғол этган, 175 та голни пеналтидан киритган. Статистик жиҳатдан қаралганда, Мессининг пеналтисиз голлари салмоғи ва самарадорлиги унинг футболдаги универсаллигини ва ўйин шароитидаги мақомини яна бир бор тасдиқлайди.

Мутахассислар ва мухлислар бу натижани янги эра бошланиши, замонавий футболда Мессининг ўрни ва таъсири янада кучайгани сифатида баҳоламоқда. Бу эса унинг нафaқат тўпурарлик, балки аниқ ва самарали ҳаракатлар орқали чинакам футбол афсонасига айланганини англатади.

Энди эса бутун футбол олами Месси ва Роналду рақобатининг келгуси поғонасида қандай статистика ва рекордлар яратилишини кутмоқда. Яна бир бор тасдиқландики, футболда рекордлар — тўхтамас жараён ва ундаги асосий “ҳарф”лар Месси ва Роналду номига боғлиқ. «Замин»ни Telegram’да ўқинг!