"Манчестер Сити" жамоаси сафида тўп сураётган ўзбекистонлик марказий ҳимоячи Абдуқодир Ҳусанов келаси мавсумни ҳам инглиз гранди сафида ўтказиши мумкин. Бу ҳақда футбол журналисти Симон Байковски ўзининг сўнгги хабарларида маълум қилди.
Маълумотларга кўра, “шаҳарликлар” раҳбарияти 21 ёшли ҳимоячига ишонч билдирмоқда ва уни 2025/26 йилги мавсум учун асосий таркибда сақлаб қолишни мақсад қилган. Бу қарор жамоа ички салоҳиятига бўлган ишончни янада мустаҳкамлайди.
Эслатиб ўтамиз, Абдуқодир Ҳусанов 2025 йил январь ойида Франция чемпионатида иштирок этувчи “Ланс” клубидан “Манчестер Сити”га ўтганди. Ўша пайтда у катта умидлар билан харид қилинган ва шу вақт ичида ўзини кўрсата олган. Ҳимоячи жорий мавсум давомида "Сити" либосида 10 та расмий учрашувда майдонга тушди ва битта гол муаллифига айланди.
Шунингдек, Ҳусанов 2029 йилгача мўлжалланган узоқ муддатли шартномага эга. Бу эса клубнинг уни келажак режаларида муҳим ўринда кўраётганидан далолат беради.
Қизиқ жиҳати, Ҳусанов билан бир вақтда клубга келган яна бир ёш ҳимоячи — Витор Рейс эса келаётган мавсумни ижара асосида Испаниянинг “Жирона” клубида ўтказиши кутилаяпти. Бу қарор “Сити”нинг ҳар бир ёш футболчи учун индивидуал ёндашувда иш олиб бораётганини кўрсатади.
Абдуқодир Ҳусановнинг “Манчестер Сити”даги келажаги Ўзбекистон футбол ишқибозлари учун катта қизиқиш уйғотмоқда. Унинг Европадаги муваффақиятли фаолияти юртимиз футболчилари учун илҳом манбаи бўлиб хизмат қилмоқда.
«Замин»ни Telegram’да ўқинг!
