Каталониянинг машҳур клуби “Барселона” сафида тўп сураётган бразилиялик вингер Рафинья 2025 йилги “Олтин тўп” мукофоти борасида ўз фикрлари билан ўртоқлашди. Унинг таъкидлашича, футболдаги индивидуал мукофотлардан кўра инсон сифатида қандай бўлиш муҳимроқ.
— Менимча, “Олтин тўп” ҳақиқий адолат асосида берилиши керак. Унинг кимга берилиши менинг шахсий фикримга боғлиқ эмас. Бу мукофотни ҳар қандай футболчи қўлга кирита олмайди. Мен учун энг катта ютуқ — ўз уйимда, фарзандларим, оилам ва яқинларим учун дунёдаги энг яхши инсон бўлиш, — деди Рафинья “Спорт” нашрига берган интервьюсида.
Унинг сўзларига кўра, жамоадоши Ламин Ямал келажакда жаҳон футболи юлдузларидан бирига айланиши мумкин:
— Ямал — ҳақиқатан ҳам ажойиб иқтидор соҳиби. Агар меҳнатдан тўхтамаса, узоқ йилларда дунёнинг энг яхши футболчиларидан бирига айланиши мумкин. Бу фақат унинг ўзига боғлиқ. Чунки унда талант бор, энди эса изчил меҳнат керак, — деб таъкидлади Рафинья.
Маълумот учун, “Барселона” жамоаси ўтган мавсумда Испания Ла Лигаси чемпионлигини, Испания Кубогини ва Суперкубокни қўлга киритган. Бу эса жамоа аъзолари орасида “Олтин тўп”га муносиблар сони кўп эканини англатади.
Ҳар ҳолда, Рафиньянинг инсон қадри ва шахсий ривожланишга берган эътибори — спортдан ташқарида ҳам ибратли ёндашув ҳисобланади.
«Замин»ни Telegram’да ўқинг!
