Opta Analyst суперкомпьютери томонидан тайёрланган таҳлилга кўра, 2025/26-йилги Англия Премьер-Лигаси мавсуми учун чемпионликка даъвогарлар аниқ бўлиб бормоқда. Жамоалар имконияти юзасидан олиб борилган мукаммал таҳлил натижасида “Ливерпул” клуби мавсумни юқори поғонада якунлаш эҳтимоли энг катта жамоа сифатида кўрсатилган.
Арне Слотнинг шогирдлари 28,5% эҳтимол билан чемпионликни қўлга киритиши мумкин, бу эса бошқа барча жамоалардан устунликни англатади. “Арсенал” 24,3% кўрсаткич билан иккинчи, “Манчестер Сити” эса 18,8% билан учинчи ўринда қайд этилган.
Айни пайтда, португалиялик мутахассис Рубен Аморим бошқараётган “Манчестер Юнайтед” учун эса мавсум унчалик муваффақиятли тарзда кечмаслиги тахмин қилинмоқда. Таҳлилларга кўра, “қизил иблислар”ни 12-ўрин кутмоқда.
Лигада қолиш учун кураш эса жуда шиддатли кечиши мумкин. “Бернли”, “Лидс Юнайтед” ва “Сандерленд” клублари тушиб кетиш эҳтимоли юқори бўлган жамоалар сифатида қайд этилган. Хусусан, “Сандерленд”нинг охирги ўринда қолиб кетиши 34,1% эҳтимол билан баҳоланмоқда.
Оптимистик рақамлар ва кутилмаган натижалар билан тўла ушбу мавсумда мухлисларни кўплаб драматик ўйинлар, кучли рақобат ва сюрпризлар кутмоқда. Ҳар бир жамоанинг бор салоҳиятини намоён қилиши эса Премьер-Лига жозибасини янада оширади.
«Замин»ни Telegram’да ўқинг!
