Сўнгги кунларда футбол олами эътиборини ўзига жалб этган “Барселона” ва жамоанинг асосий дарвозабони Марк-Андре тер Стеген ўртасидаги муаммоли вазият ниҳоят якун топди. Каталония клуби ва немис посбони ўртасида кечган музокаралар ижобий натижа билан тугаб, ҳар икки томон ҳам келишувга эришганини расман эълон қилди.
Расмий маълумотларга кўра, “Барселона” 33 ёшли тажрибали посбонга сардорлик боғичини яна қайтарди. Бу қарор жамоадаги ички муҳитни барқарорлаштириш ва футболчилар ўртасида ишончни мустаҳкамлаш йўлида муҳим қадам сифатида баҳоланмоқда. Тер Стеген эса ўз навбатида клубнинг тиббий гуруҳи учун Ла Лига раҳбарияти олдида расмий баёнот бериш ваколатини берувчи махсус ҳужжатга имзо чекиб, жамоа манфаатларини устувор қўйишини кўрсатди.
Бу келишув натижасида “Барселона” энди жамоага яқинда келиб қўшилган ёш ва умидли дарвозабон Жоан Гарсияни Ла Лига рўйхатидан ўтказиш ҳуқуқига эга бўлди. Гарсиянинг расман рўйхатга олиниши эса жамоанинг янги мавсумда дарвозада рақобатни кучайтириши ва барқарорликни таъминлаши кутилмоқда.
Мухлислар учун эса бу янгилик икки жиҳатдан муҳим: биринчиси — севимли жамоасидаги тажрибали сардорнинг қолиши, иккинчиси эса янги қўшилган дарвозабоннинг ўз имкониятларини намойиш қилиш имконини қўлга киритиши. Каталония клуби янги мавсум остонасида ички зиддиятларни бартараф этиб, майдонда фақат спорт йўлида курашишга тайёр эканини кўрсатди.
«Замин»ни Telegram’да ўқинг!
