“Манчестер Сити”нинг маҳоратли бош мураббийи Пеп Гвардиола жамоа таркибидаги ўйинчилар сонининг кўплиги унга маъқул эмаслигини очиқчасига баён қилди. Унинг фикрича, жамоа самарали ишлаши учун ихчам ва мувозанатли таркиб зарур.
“Биз таркибдаги футболчилар сонини қисқартиришимиз керак. Менга бунчалик кўп ўйинчи билан машғулот олиб бориш маъқул эмас. Кўплаб ўйинчилар жамоани тарк этишлари зарур. Трансфер ойнаси ҳали очиқ ва биз бир нечта футболчи билан хайрлашишимиз мумкин. Вақт кўрсатади, ким қаерга йўл олишини”, — деб таъкидлади Гвардиола.
Испаниялик мураббийнинг бу гаплари жамоада рақобат даражаси юқори эканлигини ва айрим футболчиларга доимий ўйин амалиёти бериш имконияти чекланганини англатади. Шу боис, у янги мавсум остонасида ортиқча тўпланиб қолган таркибни оптималлаштиришни мақсад қилган.
Аввалроқ, жорий ёзда клуб сафини Штефан Ортега, Жеймс Макати, Эдерсон ва Жек Грилиш каби номдор футболчилар тарк этиши мумкинлиги ҳақида хабарлар тарқалган эди. Бу эса Гвардиоланинг сўзларини янада кучлироқ маъно билан тўлдиради.
Мухлислар эса, кимлар жамоада қолиши ва кимлар бошқа клубларга йўл олишини қизиқиш билан кутмоқда. Чунки “Манчестер Сити”да ҳар бир трансфер қарорининг ортида катта стратегия ва жамоанинг келажак режаси ётади.
«Замин»ни Telegram’да ўқинг!
