Бугун “Сантьяго Бернабеу”да Мадриднинг “Реал” клуби навбатдаги ёш ва иқтидорли футболчи билан тарихий саҳифани очди. 18 ёшли аргентиналик ярим ҳимоячи Франко Мастантуоно расман “қироллик клуби” аъзоси сифатида тақдим этилди. У “Ривер Плейт”дан 45 миллион еврога трансфер қилинди ва бу келишув ёш футболчи учун катта қадам бўлди.
Переснинг самимий сўзлари
“Реал” президенти Флорентино Перес тақдимот маросимида ёш футболчини илиқ сўзлар билан кутиб олди:
— Бугун клубимиз учун ҳам, сиз учун ҳам ўзига хос кун. Сўнгги йилларда футболда порлаган энг истеъдодли ёшлардан бири бизнинг сафимизга қўшиляпти. Қадрли Мастантуоно, туғилган кунингизда орзуйингиз амалга ошгани билан табриклайман. “Ривер Плейт” – “Реал” тарихи билан узвий боғлиқ клуб ва сиз бугун бизда ўйнаган нуфузли аргентиналиклар рўйхатига қўшиласиз. Энди сиз 15 марта Европа чемпиони бўлган жамоанинг оқ либосини киясиз. Биз билан бўлишга қарор қилганингиз учун катта раҳмат, — деди Перес.
“Ривер Плейт”дан “Бернабеу”га
Мастантуоно учун бу трансфер нафақат янги клуб, балки янги босқич, катта босқич. “Ривер Плейт”да у ёш бўлишига қарамай, асосий таркибда ўзини кўрсата олган ва Европанинг бир нечта гранд клублари эътиборини тортган эди.
Мухлислар интизори
Эндиликда “Реал” ишқибозлари янги маҳоратли ярим ҳимоячини Ла Лигада ва Европа майдонларида кўришни интизорлик билан кутмоқда. Франко учун эса Мадриддаги ҳар бир ўйин ўз истеъдодини намоён этиш ва Перес айтганидек, клуб нуфузига муносиб бўлиш имконияти ҳисобланади.
«Замин»ни Telegram’да ўқинг!
