Суперлиганинг 19-туридан ўрин олган “Насаф” – “Шўртан” (2:0) баҳсидан кейин меҳмон жамоа бош мураббийи Элдор Мойлиев матбуот анжуманида иштирок этиб, ўйин ҳақида ва жамоанинг ҳолати бўйича ўз фикрларини билдириб ўтди.
— Бугунги баҳсда асосий тактикамиз қарши ҳужумлардан унумли фойдаланиш эди, — деди Мойлиев. — Биринчи бўлимда бу режа маълум даражада иш берди. Яхши ҳимояландик, баъзи вазиятлар ҳам яратдик. Бурчак тўпидан кейин гол уриш имконияти бўлди, аммо ундан фойдалана олмадик. Иккинчи таймда эса диққатни бироз йўқотдик. Айниқса, таянч ярим ҳимоячиларимиз биринчи голда ёрдамга келиши шарт эди, лекин диққат етишмади. Иккинчи гол эса ўз хатомиз оқибатида юз берди. “Насаф”нинг ҳимоя чизиғини бузиб ўтиш биз учун жуда қийин кечди. Шу боис рақибни муносиб ғалаба билан табриклайман.
Мураббий жамоада тажрибали ўйинчиларнинг кам қўлланилаётгани ҳақида ҳам изоҳ берди:
— Жасур Ҳакимов ҳозирча индивидуал машғулот билан чекланмоқда. Нуриддин Ҳасанов эса эндигина жароҳатдан тузалиб, аста-секин таркибга киришмоқда. Кейинги баҳсларда улардан фойдаланишга ҳаракат қиламиз.
Анвар Бердиев жамоани тарк этганидан кейинги ўзгаришлар ҳақида сўралганда эса у қуйидагича жавоб қайтарди:
— Асосан марказий ярим ҳимоячи ва ҳужумчиларни таклиф қилдик. Бир-икки нафар легионер олиш ниятимиз бор эди, лекин омад юз бермади. Кўзлаган футболчиларимизни чақиролмадик. Шунга қарамай, ёшлар билан нимадир қилишга уриняпмиз.
“Шўртан”нинг иккинчи даврадаги қийинчиликлари ҳақида тўхталиб, Мойлиев шундай деди:
— Иккинчи даврага тайёргарликни кўплаб янги футболчилар билан бошладик. Улар жамоага тез мослашиши қийин бўляпти. Ўз майдонимизда яхши ҳаракат қиляпмиз, аммо қарши ҳужумларда кўп гол ўтказиб юбораяпмиз. “Хоразм” ва “Қўқон-1912”га қарши жуда муҳим — олти очколик ўйинларда ҳам имкониятни бой бердик.
Мураббий жамоанинг кўп гол ўтказиши ҳақида ҳам фикр билдирди:
— Буни фақат дарвозабон ёки ҳимоячилар хатоси билан боғлаш тўғри эмас. Замонавий футболда бутун жамоа ҳимояланиши керак. Агар ҳужумчилар ва ярим ҳимоячилар орқага қайтиб ёрдам бермаса, дарвозани ҳимоя қилиш деярли имконсиз. Бу ерда барчамизнинг хатоимиз бор.
Сўнгги савол сифатида жамоанинг Суперлигада қолиш имконияти ҳақида сўралди:
— Ҳали имкониятларимиз йўқотилгани йўқ. Бу йўлда нафақат бизга, балки бошқа жамоаларга ҳам қийин бўлади. Аммо биз охиригача курашишдан тўхтамаймиз, — деди Мойлиев қатъият билан.
Хулоса қилиб айтганда, “Шўртан” Каршида мағлуб бўлган бўлса-да, Элдор Мойлиев жамоасини руҳан тушкунликка тушмаганини ва сўнгги тургача кураш олиб бориш ниятида эканини маълум қилди. Унинг сўзларидан жамоанинг асосий шиори аниқ: мағлубиятдан сабоқ олиш ва майдонда бор имконият билан ҳаракат қилиш.
Манба: championat.asia
«Замин»ни Telegram’да ўқинг!
