Суперлиганинг 20-туридан ўрин олган «Насаф» – «Сурхон» (2:1) баҳсидан сўнг Термиз клуби бош мураббийи Февзи Давлетов матбуот анжуманида иштирок этиб, учрашув ҳақида ўз фикрларини билдирди. Унинг таъкидлашича, жамоа баъзида ўз кучига ишонмагани ва майдондаги хатолар натижада қимматга тушганини тан олди.
«Биринчи бўлимда ҳимояда анча тўғри ўйнадик»
— «Насаф» чемпионат етакчиси эканини яхши билардик ва биз учун оғир баҳс кутиб турганини англаб майдонга тушдик. Биринчи бўлимда ҳимояда анча яхши ҳаракат қилдик, аммо жуда кўп хатоларга йўл қўйдик. Бунинг сабаби эҳтимол рақибнинг босими, эҳтимол эса футболчилардаги ортиқча ҳаяжон бўлгандир. Ҳаракатларда ўз кучига ишонмаслик сезилди.
«Иккинчи таймда хатолар жазоланди»
— Иккинчи бўлимда оддий вазиятда 4 дақиқа ичида икки марта хатога йўл қўйдик ва рақиб эса бундай хатоларни кечирмайди. Шу голлардан кейин биз ҳам ҳужумкорроқ ҳаракат қилишни бошладик. Савол туғилади: нима учун биринчи бўлимда бунга қодир бўлмадик? Буни албатта таҳлил қиламиз.
«Ўз кучимизга ишонишимиз шарт»
— «Сурхон»нинг Қўқондаги ва бугунги ўйини мухлисларга манзур бўлганини эшитиб хурсандман. Халқ севган жамоага айланаётганимиз — бу биз учун масъулият ҳамдир. Бироқ айни шу беллашувда ўз кучимизга ишонмаганимиз асло тўғри эмасди. Хатоларни чуқур ўрганамиз ва кейинги баҳсларга жиддий тайёрланамиз, — деди мураббий.
Февзи Давлетовнинг таъкидлашича, «Сурхон» олдиндаги ўйинларда кучлироқ ва ишончлироқ тарзда майдонга тушишни мақсад қилган. Мураббий мухлисларга қўллаб-қувватлови учун миннатдорчилик билдирди.
«Замин»ни Telegram’да ўқинг!
