Испания Ла Лигасининг 2-туридан ўрин олган жозибали учрашув мухлислар учун ҳақиқий драматик саҳнага айланди. Каталония гранди “Барселона” сафарда “Леванте”га қарши майдонга тушиб, биринчи бўлимдан кейин 0:2 ҳисобида ортда борарди. Бироқ иккинчи таймда ирода ва жамоавий куч туфайли натижа бутунлай ўзгарди — Флик шогирдлари 3:2 ҳисобини қайд этиб, мухлисларига қувонч улашди.
Беллашувдан кейин “Барселона” бош мураббийи Ханс-Дитер Флик журналистлар билан суҳбатда ўйин ҳақида ўз таассуротлари билан ўртоқлашди.
“Ўйинимиз айни кунда мукаммал кўриниш олмади, лекин тан олиш керак — ‘Леванте’ анча кучли ва интизомли ҳаракат қилди. Ғалаба биз учун осон кечмади, чунки рақиб жуда чуқур ҳимояланишга ҳаракат қилди ва бу ҳолат ўйинни янада қийинлаштирди. Шунга қарамасдан, биз ҳужумда тўхтамадик, имконият излашда давом этдик ва ниҳоят, ғалабани қўлга кирита олдик. Бу каби синовли баҳслар жамоа ўсиши ва тажриба орттириши учун жуда фойдали бўлади”, — деди немис мутахассис.
Флик айни пайтда иккинчи бўлимда амалга оширилган тактик ўзгариш ҳақида ҳам алоҳида тўхталди:
“Танаффусдан сўнг бизга янги куч ва янги руҳланиш зарур эди. Шунинг учун Рафиньяни майдонга туширишга қарор қилдик. Бу қарор ўзини тўлиқ оқлади — у жамоага янги энергия киритди ва ўйин таъсирини бутунлай ўзгартирди”.
Мухлислар учун эса энг қувонарли жиҳат — “Барселона”нинг руҳий мустаҳкамлиги ва қайтиш қобилияти яна бир бор ўз исботини топди. Шундай иродали ғалабалар жамоа кайфиятини кўтариш билан бирга, мавсумдаги катта мақсадларга ҳам кучли туртки бўлиши мумкин.
«Замин»ни Telegram’да ўқинг!
