Майор Лига Соккер (МЛС) доирасидан ўрин олган баҳсда “Интер Майами” аутсайдер ҳисобланган “Ди-Си Юнайтед”га қарши сафарда майдонга тушиб, 1:1 ҳисобида дуранг қайд этди. Учрашувда мухлислар учун энг катта ҳайратли жиҳат – жамоанинг етакчи юлдузлари Лионель Месси ва Жорди Альбанинг майдонга тушмагани бўлди.
Учрашувдан кейин бош мураббий Хавьер Маскерано матбуотга изоҳ бериб, бу қарорнинг сабабларини ошкор қилди.
“41 та ўйин ўтказдик ва футболчиларга навбатма-навбат имконият беришга мажбурмиз. Чунки жамоада тўлиқ ва чуқур таркиб бўлиши шарт. Шу боис Месси ва Альбага дам бериш тўғри қарор деб ҳисоблайман. Якунда танловим тўғри бўлганига амин бўлдим”, — деди Маскерано.
Мураббий шунингдек, ўйинга заҳирадан қўшилган юлдузлар – Луис Суарес, Серджи Бускетс, Родриго Де Поль ва Бальтасар Родригесларнинг жамоага қўшган ҳиссасини ҳам алоҳида таъкидлади.
“Аслида, агар баҳснинг бошиданоқ юқори суръатда ўйнаганимизда, эҳтимол ғалаба ҳам бизники бўларди. Аммо шу ўйин орқали яна бир бор таркибнинг барча аъзоларига ишонч билдириш қанчалик муҳим эканини кўрдик”, — дея қўшимча қилди Маскерано.
Шу тариқа, “Интер Майами” навбатдаги учрашувларда қайси юлдузларни майдонга тушириши ва қайси тактикани қўллаши мухлислар учун янада қизиқиш уйғотмоқда. Бу дуранг эса жамоанинг келгуси йўналишида қайси жиҳатларга эътибор қаратиши зарурлигини очиқ-ойдин кўрсатиб берди.
«Замин»ни Telegram’да ўқинг!
