Журналист Альфредо Педулла тарқатган маълумотларга кўра, Англия чемпиони “Манчестер Сити” ПСЖнинг асосий дарвозабони Жанлуижи Доннаруммани ўз сафларига қўшиб олиш учун жиддий ҳаракатларни бошлаб юборди. Манбаларга кўра, манчестерликлар француз клубига тахминан 30 миллион евро таклиф қилишга тайёр ва ушбу маблағ келишувни амалга ошириш учун етарли бўлиши кутилмоқда.
Маълум қилинишича, икки клуб вакиллари ҳозирда узлуксиз равишда музокаралар олиб боришмоқда. Шу билан бирга, футболчининг ўзи аллақачон “шаҳарликлар” билан шахсий шартнома борасида тўлиқ келишиб олгани хабар қилинмоқда.
Аввалроқ парижликлар Доннаруммани сотиш учун 45–50 миллион евро талаб қилишган эди. Бироқ ҳозирги шароитда 26 ёшли посбонни арзонроқ нархда қўйиб юбориш эҳтимоли анча катта экани айтилмоқда.
Италия терма жамоаси аъзоси ҳисобланган Доннарумма сўнгги йилларда ПСЖ дарвозасини муваффақият билан қўриқлаб келаётганди. Шу билан бирга, унинг Париждаги келажаги ҳақида саволлар кўпайиб, Европа грандлари унинг атрофида жиддий қизиқиш билдиришмоқда.
Агар мазкур трансфер амалга ошса, “Манчестер Сити” учун муҳим муваффақият бўлади. Чунки Хосеп Гвардиола бошқараётган жамоа кейинги мавсумларда барқарор дарвозабонга муҳтож эди. Доннарумманинг тажрибаси ва маҳоратли сейвлари эса “Сити”нинг ҳимоя чизиғини янада мустаҳкамлаб, жамоани Европа майдонларида ҳам кучли рақибга айлантиради.
Шу тариқа, яқин кунларда бу трансфер футбол оламида энг муҳим янгиликлардан бирига айланиши кутилмоқда. Мухлислар эса Доннарумманинг Англияга келиши қанчалик тез амалга ошишини қизиқиш билан кутмоқда.
«Замин»ни Telegram’да ўқинг!
