Футзал бўйича Ўзбекистон Суперкубоги доирасида мамлакатимизга ташриф буюрган Бразилия футболи афсонаси Дуглас Майкон матбуот анжуманида иштирок этиб, мухлислар ва журналистлар саволларига жавоб қайтарди.
Жаҳон футболи юлдузлари билан ўтказилган анжуманда асосий мавзулардан бири Бразилия терма жамоасига яқинда олиб келинган хорижлик мураббий масаласи бўлди.
Савол жараёнида журналистлар Карло Анчелоттининг келиши мамлакатда қандай баҳолангани ва унинг терма жамоа билан қай даражада муваффақият қозониши мумкинлиги ҳақида сўрашди.
Майкон бу саволга жавоб берар экан, аввало Ўзбекистон футзал федерацияси раҳбариятига меҳмон сифатида таклиф этилгани учун миннатдорлик билдирди ва фикрларини баҳам кўрди:
“Менимча, Карло Анчелоттининг олиб келиниши тўғри қарор бўлди. Ахир жаҳон чемпионлигини қўлга киритмаганимизга ҳам анча йиллар бўлди. Бизга айнан тажрибали, катта мактабни босиб ўтган мураббий керак эди. Анчелоттининг бой тажрибаси ва футболдаги нуфузи Бразилия термаси учун катта ёрдам беради, деб ишонаман. У билан биргаликда мақсадларимизга эриша оламиз”, — деди афсонавий ҳимоячи.
Шу тариқа, Майконнинг фикрича, Анчелоттининг тайинланиши нафақат терма жамоа учун янги босқич, балки бразилиялик футбол ишқибозлари учун ҳам катта умид уйғотмоқда.
Манба: t.me/Futsal_Uzbekistan
«Замин»ни Telegram’да ўқинг!
