Чемпионлар Лигасининг умумий босқичига қуръа ташлаш маросими куни нуфузли Goal нашри ўзининг анъанавий фаворитлар рейтингини тақдим этди. Мутахассислар фикрича, жорий мавсумда ҳам чемпионликка асосий даъвогар сифатида Парижнинг машҳур клуби — ПСЖ қайд этилмоқда.
Катта қизиқиш уйғотган рўйхатда иккинчи поғонадан “Барселона” ўрин олди. Каталон клуби кейинги мавсумларда таркибини жиддий кучайтириб, яна Европа қитъасида етакчилар сафида эканини исботлади. Учинчи ўринни эса Англиянинг “Арсенал” жамоаси эгаллади. Айни пайтгача “канонирлар” ҳеч қачон Чемпионлар Лигасида ғалаба қозонмаган бўлса-да, улардан катта умидлар қилинаётгани таъкидланди.
Топ-10 таликда, шунингдек, “Ливерпуль”, “Реал Мадрид”, “Бавария”, “Челси”, “Манчестер Сити”, “Интер” ва “Тоттенхэм” жамоалари ҳам жой олди. Улар ҳар бир мавсумда Европа саҳнасида ўз сўзини айтадиган клублар сифатида эътироф этилмоқда.
Ажабланарлиси, ЕЧЛ тарихида илк бор умумий босқичга йўлланма олган Қозоғистон чемпиони — “Қайрат” ҳам рейтингдан ўрин эгаллади. Олмаота клуби чемпионликка асосий даъвогарлар орасида 35-ўриндан жой олди ва бу натижа мамлакат футболи учун тарихий аҳамият касб этади.
Муттахассислар таъкидлашича, “Қайрат” етакчилар қаторида бўлмаса-да, ўз ўйини ва ғалабалари билан катта сюрприз яратиши мумкин. Мухлислар эса жамоанинг Европада қандай иштирок кўрсатишини қизиқиш билан кутмоқда.
«Замин»ни Telegram’да ўқинг!
