"Манчестер Юнайтед" клуби раҳбарияти жамоа бош мураббийи Рубен Аморим билан шартнома узилган тақдирда унинг ўрнини эгаллаши мумкин бўлган мутахассислар рўйхатини тайёрлаб қўйди. Бу ҳақда Caught Offside нашри орқали маълум қилинди.
Манба хабарига кўра, “қизил иблислар”нинг қисқа рўйхатида икки ном асосий тарзда қайд этилган. Биринчиси — ҳозирда "Кристал Пэлас"ни бошқариб келаётган Оливер Гласнер. Иккинчиси эса "Борнмут" жамоаси устози Андони Ираола.
Маълумотларга кўра, aйни пайтда Гласнернинг номзоди директорлар кенгаши томонидан энг кўп муҳокама қилинмоқда. Австриялик мураббий эса бундай имкониятдан хурсанд бўлиб, "Манчестер Юнайтед"га қўшилишни орзу қилиши айтилмоқда.
Шу билан бирга, клуб Англия терма жамоасининг собиқ устози Гарет Саутгейт номига ҳам қизиқиш билдирган. Бироқ бу вариант ҳозирча эҳтимолдан узоқроқ кўрилмоқда, сабаби раҳбарият мухлисларнинг салбий муносабати ва эҳтимолий танқидидан хавотирда.
Муттахассислар фикрича, “Олд Траффорд”даги вазият яқин ҳафталарда янада қизийди ва клубнинг кейинги йўналиши катта қизиқиш билан кузатилмоқда. Мухлислар эса жамоа қайси мураббий билан келажакка қадам қўйишини интиқлик билан кутишмоқда.
