date

Кейруш: “Ўзбекистон футболи уйқудан уйғонди ва тез ўсмоқда”

Кейруш: “Ўзбекистон футболи уйқудан уйғонди ва тез ўсмоқда”

Ўмон миллий жамоаси бош мураббийи Карлуш Кейруш матбуот анжуманида Ўзбекистон футболи ҳақида ўз қарашлари билан ўртоқлашди. Таҗрибали мутахассис сўзларига кўра, сўнгги йилларда ўзбек футболининг ривожланиш суръати барча томондан яққол сезилмоқда.

— Ўзбекистон терма жамоаси ҳақида менда аниқ маълумотлар мавжуд. Жамоа ҳақида яхши фикрдаман. Улар жуда ўсишди. Бир неча йил олдин биз ўзбеклардан бир неча қадам илгарироқ эдик, аммо ўша пайтлардаёқ сизларда ўсиш жараёни бошланганини ҳис қилганман, — деди Кейруш.

Унинг таъкидлашича, мамлакатда футбол соҳасида тизимли ислоҳотлар амалга оширилмоқда ва бу самара аллақачон натижаларда кўриниб турибди. — Ўзбекистон футболни қандай йўналишда ривожлантириш кераклигини тушуниб етди. Бу ҳозир натижаларда ҳам акс этмоқда. Терма жамоангиз Жаҳон чемпионатига чиқди, бир қатор футболчиларингиз эса Европада ўзини ишончли кўрсатмоқда. Ривожланиш узоқ йўл, лекин сизлар тез суръатда олға юрибсизлар, — дея қайд этди мураббий.

Кейруш, шунингдек, бир неча йил аввал ўзбек футболи анча суст ҳолатда бўлганини, ҳозир эса бутунлай бошқача манзара кузатилаётганини қайд этди: — Бир пайтлар Ўзбекистон футболи “уйқу”да эди. Ҳозирда эса сизлар жуда тез ва ишончли ҳаракат қилаяпсизлар. Осиёдаги бошқа жамоалар эса ҳали ҳам “уйқу”да, — дея қўшимча қилди у.

Мураббий фикрича, натижага эришиш фақат мураббий алмашиши билан эмас, ёшларга ишониш ва уларга имконият бериш билан боғлиқ. — Биз ҳам бу турнирга ёш футболчиларни олиб келдик. Улар сизлар каби футболга чанқоқ. Шу билан яхши натижаларга эришиш мумкин, — деди Кейруш.

Шунингдек, у Ўзбекистон миллий жамоасига бош мураббий сифатида тайинланиши мумкин бўлган ҳамюрти Паулу Бенту ҳақида ҳам тўхталиб ўтди: — Бенту катта тажрибага эга бўлган ажойиб мураббий. У ҳақиқий профессионал. Футболчилик фаолияти ҳам муваффақиятли ўтган. Унга фақат энг яхши тилакларни тилайман. У жуда кучли мутахассис, — дея таъриф берди Кейруш.


Манба: championat.asia

Ctrl
Enter
Хато топдИнгизми
Иборани ажратиб Ctrl+Enter тугмасини босинг
Янгиликлар » Спорт » Кейруш: “Ўзбекистон футболи уйқудан уйғонди ва тез ўсмоқда”