Пауло Бенту Ўзбекистон Миллий терма жамоаси бош мураббийи бўлиши тобора ойдинлашиб бормоқда. Бу мутахассисни кўпчилик Бирлашган Араб Амирликлари ва Португалияда қайд этган натижаларига қараб баҳолаяпти, шунинг учун баъзи мухлисларда унга нисбатан ишончсизлик кайфияти ҳам шаклланиб бормоқда.
Пауло Бенту ким ва Осиёда қандай ишлаётганди?
Португалиялик мураббий Пауло Бенту Тошкентга етиб келди. У Ўзбекистон миллий жамоаси билан шартнома имзолаши кутилмоқда. Бенту фаолиятининг сўнгги етти йилини Осиёда ўтказмоқда: 2018–2022 йилларда Жанубий Корея термасини, 2023–2025 йилларда эса БАА терма жамоасини бошқарди.
Жанубий Корея (2018–2022)
Португалиялик мутахассис 2018 йил 17 август куни Жанубий Корея терма жамоаси бош мураббийи этиб тайинланди. Илк йирик синов — Осиё кубоги-2019 бўлди: БААдаги мусобақада кореяликлар гуруҳда 1-ўринни олди, нимчорак финалда Баҳрайнни қўшимча вақтда енгди ва чорак финалда Қатарга 0:1 ҳисобида мағлуб бўлди.
ЖЧ-2022 саралашида жамоа сўнгги босқични Эрондан (25 очко) кейин 23 очко билан 2-ўринда якунлади. Қатар Мундиалида эса гуруҳ босқичини 2-ўринда тамомлаб (Уругвайни ортда қолдирган ҳолда), нимчорак финалда Бразилияга 1:4 ҳисобида имкониятни бой берди. Шундан сўнг Бенту истеъфо берди — бу қарорни у 2022 йил сентябридаёқ ўзи учун белгилаганини ва дам олишни истаганини айтди, яъни шартнома охиригача ишлади.
Бирлашган Араб Амирликлари (2023–2025)
Пауло Бенту 2023 йил 9 июлда БАА термаси бош мураббийига айланди. ЖЧ-2026 саралашида кутилган марраларга етиша олмади ва 2025 йил 26 март куни ассосация уни штаби билан бирга лавозимидан озод этди.
Ўйин услуби
Пауло Бенту нисбатан ҳужумкор ёндашув тарафдори: фаол прессинг, позицион интизом ва баландроқ суръатни талаб қилади. Жанубий Кореяда таркиб сифати юқори бўлгани учун бу услуб самара берди. Аммо БАА билан кучлироқ рақибларга (Эрон ва Ўзбекистон) қарши ўйинларда муваффақиятсизликка дуч келди.
Ўзи бошқарган терма жамоалардаги умумий статистикаси
Португалия (2010–2014): 47 ўйин, 26 ғалаба, 12 дуранг, 9 мағлубият, PPM 1.89.
Жанубий Корея (2018–2022): 57 ўйин, 35 ғалаба, 13 дуранг, 9 мағлубият, PPM 2.07.
БАА (2023–2025): 26 ўйин, 14 ғалаба, 6 дуранг, 3 мағлубият, PPM 1.81.
«Плюс» ва «минус»ларини қандай ўқиймиз?
Эътирозлардан ҳозир фойда йўқ — Бенто термамиз бош мураббийи бўлиши деярли аниқ, унга тўлиқ баҳо бериш имкони ҳали олдинда. Агар БААдаги натижалар фонида уни «ёмон мураббий» деб атаётган бўлсак, Жанубий Корея билан Мундиалдагидек муваффақиятли чиқиш унга юқори баҳони ҳам бердира олади: у Португалия, Уругвай ва Гана каби жамоалар тўпланган гуруҳдан чиқишни уддалади.
Қўшимча тарзда эслатсак: Бенту бошчилигидаги БАА Ўзбекистон ва Эронга қарши беллашувларда йўқотишларга учради, бироқ шу терма Қатарни 5:0 ҳисобида йирик мағлубиятга учратган. Демак, унинг жамоалари одатда анча ҳужумкор, ҳимояда эса доим ҳам мукаммал эмас. Кўпчилик Катанецни бунинг «акси» бўлгани учун танқид қиларди; Бенту — мухлислар хоҳлаган типга яқин ва, энг муҳими, майда ном эмас.
Хулоса
Қарор қабул қилинган экан, бунга таъсир ўтказа олмаймиз — фақат Мундиалдан кейин хулоса чиқарамиз. Ҳозирча энг тўғриси: янги мураббийга ишонч вақти, интизом ва режага содиқлик. Рақамлар ва тажриба бор — энди уларни майса устидаги натижага айлантириш қолди.
Манба: Sports.uz
«Замин»ни Telegram’да ўқинг!
