Яқин кунларда оммавий ахборот воситаларида енгил вазн тоифасида UFC чемпиони ҳисобланган Илия Топурия ҳақида турли миш-мишлар тарқалди. Айниқса, унинг «UFC 322» турнири доирасида Жастин Гэтжига қарши октагонга чиқиши мумкинлиги ҳақида хабарлар кенг муҳокамаларга сабаб бўлди. Бироқ, ўтган кеча вазиятга аниқлик киритилди.
Чемпионнинг менежери Лукаш Орзел бу маълумотларни расман рад этди. Унинг таъкидлашича, тарқалган хабарлар ҳақиқат билан ҳеч қандай боғлиқ эмас ва барчаси сохта манбадан тарқалган.
«Жастин Гэтжига қарши жанг ҳақидаги гаплар — тўлиқ асоссиз. Кимдир сохта аккаунт орқали менинг номимдан сохта сурат тарқатган ва кейин ўчириб ташлаган. Афсуски, айрим ОАВлар буни текширишга уринмай, маълумотни тарқатишга шошилишган. Аслида эса Илия ҳозир ҳатто машғулот лагерида ҳам эмас, чунки унга жанг бўйича ҳеч қандай расмий таклиф берилмаган», — дея урғу берди Орзел.
Топуриянинг мухлислари учун бу хабар бироз ноқулай бўлса-да, у ҳозирги ҳолатда фақат дам олиш ва тикланиш жараёни билан банд. Унинг кейинги рақиби ким бўлиши ҳақида эса ҳозирча ҳеч қандай аниқлик йўқ.
Эслатиб ўтамиз, Илия Топурия охирги марта «UFC 317» турнирида октагонга чиқиб, бразилиялик машҳур жангчи Чарльз Оливейрани биринчи раунддаёқ нокаутга учратган эди. Бу ғалаба орқали у ўз чемпионлик нуфузини янада мустаҳкамлаганди.
Шу тариқа, Илия Топурия келгуси жанг ҳақидаги барча саволларга ҳозирча аниқ жавоб бермаган. Аммо у қайси рақиб билан октагонга қадам қўймасин, мухлислар унинг жангини катта қизиқиш билан кутмоқда.
«Замин»ни Telegram’да ўқинг!
