“CAFA Nations Cup-2025” мусобақасида Ўзбекистон миллий терма жамоаси илк баҳсини Ўмонга қарши ўтказди. Тошкентдаги йирик беллашув 1:1 ҳисобида дуранг билан якунланди. Учрашувдан кейин жамоа бош мураббийи Тимур Кападзе ва Ҳожимат Эркинов ўз фикрлари билан ўртоқлашишди.
Кападзе ўйин ҳақида шундай деди:
“Учрашув биз кутгандек осон кечмади. Дастлабки дақиқаларда гол ўтказиб юбордик. Асосий мақсадимиз рақиб дарвозасига гол киритиш эди, аммо имконият яратишда қийналдик. Кўрдингиз, Ўмон янги мураббий остида ҳаракат қилди ва майдонда жуда кўп камчиликларимиз кўзга ташланди”.
Футболчи Ҳожимат Эркинов ҳам ўйиндан сўнг ўз фикрини билдирди:
“Беллашув кутганимиздан ҳам оғир бўлди. Бироқ кейинги баҳсларда албатта ғалаба қозониш учун барча кучимиз билан ҳаракат қиламиз”.
Матбуот анжуманида қанотлардан берилган узатмалар кўплиги ва узоқ масофадан зарбаларнинг йўқлиги ҳақида савол берилганда, Кападзе шундай жавоб қайтарди:
“Ўмон жуда зич ҳимояланди. Шунинг учун марказда имконият деярли бўлмади. Икки қанотда бўш зоналар кўпроқ эди ва шуни қўлладик”.
Баланд ҳимоячиларга қарши кураш масаласида устоз қўшимча қилди:
“Аниқ айтсам, бизга баланд бўйли футболчилар керак. Рақиб термаси 10 кун аввал йиғинга киришди ва ҳар бир футболчи янги мураббий олдида ўзини кўрсатишга интилди. Бу бизга қийинчилик туғдирди. Бизда эса икки кунгина йиғин бўлди, шундан бири тикланишга қаратилган эди. Шунингдек, янги мураббий келиши ҳақидаги миш-мишлар ҳам диққатни бўлиб қўйди. Лекин ўша вазиятдан фойдаланиб, ҳисобни тенглаштирдик. Энди эътиборни кейинги учрашувга қаратамиз”.
Жаҳон чемпионати ҳақида саволга Эркинов шундай жавоб берди:
“Ростини айтсам, ҳали бу ҳақида ўйлаб кўрмаганман. Олдимизда жуда кўп учрашувлар бор. Вақт яқинлашган сари шу масала ҳақида ўйлай бошлаймиз”.
Майдон ҳолати ва интизом ҳақида ҳам фикрлар билдирилди. Эркинов: “Ўйин давомида майдон билан боғлиқ жиддий муаммо бўлмади. Иккинчи бўлимда ўзимни янада эркин ҳис қилдим”.
Кападзе эса жамоанинг умумий ҳолати ҳақида:
“Жисмоний жиҳатдан ҳам ёмон эмасдик, мотивация ҳам етарли эди. Бироқ икки кун давомида кўплаб футболчиларнинг йиғинга қўшилишини кутдик, шу боис тўлиқ тактик тайёргарликка вақт етарли бўлмади. Биз Ўмоннинг собиқ мураббийи олиб борган ўйинларни кўрган эдик, аммо Карлуш Кейруш бошқача услуб қўллади ва бу ҳам ўйинга таъсир кўрсатди”.
Шу тариқа, термамиз мусобақани дуранг билан бошлади. Мухлислар эса кейинги баҳсларда жамоанинг кучлироқ ўйинини кутишмоқда.
