Меҳди Тареми Грецияга йўл олди, CAFA мусобақасини ўтказиб юборди

Эрон миллий терма жамоаси етакчиларидан бири – Меҳди Тареми «CAFA Nations Cup-2025» турнирида майдонга туша олмайди. Сабаби, ҳужумчи Грецияга йўл олиб, у ерда «Олимпиакос» клуби билан шартнома имзолаш жараёнларига қўшилди.

Эслатиб ўтиш жоиз, ундан олдин Эрон термасининг яна бир муҳим ҳужумчиси – Алиризо Ҳусайнзода олган жароҳати туфайли жамоа сафига ёрдам бера олмаслиги маълум қилинган эди. Бу эса терма жамоа мураббийлари учун катта йўқотиш ҳисобланади.

Тареми ўтган мавсум Италиянинг нуфузли клуби «Интер» таркибида ҳаракат қилган. У 26 та учрашувда майдонга тушиб, рақиб дарвозасини бир марта ишғол қилган ҳамда икки голли узатмани амалга оширган.

Мутасаддилар фикрича, футболчининг «Олимпиакос»га ўтиши унинг Европа саҳнасидаги фаолиятида янги саҳифа очиши мумкин. Бироқ ҳозирча энг катта савол – Эрон термаси усиз CAFA мусобақасида қандай натижа кўрсата олади, деган масала бўлиб турибди.

Шухрат Раззаков

«ЗАМИН.УЗ» муҳаррири