Англия Премьер-лигасининг янги мавсумида «Манчестер Сити»нинг тайёргарлиги жиддий муҳокамаларга сабаб бўлмоқда. Илк турда «шаҳарликлар»нинг «Вулверхэмптон»ни 4:0 ҳисобида тор-мор қилиши катта эътибор қозонган ва кўпчилик Гвардиола жамоаси яна ҳаммани ортда қолдиради, деган фикрга келганди.
Бироқ кейинги турда вазият тубдан ўзгарди. «Тоттенҳэм» Манчестердан 2:0 ҳисобида ғалаба билан қайтди. Учинчи турда эса Гвардиола шогирдлари ўз кучини яна бир бор исботлаш имконига эга эди.
«Брайтон» майдонидаги баҳсда меҳмонлар дастлабки бўлимда тўлиқ устунликка эга бўлишди. Бироқ кўплаб имкониятлардан фақат биттаси голга айланди — Эрлинг Холанд ўзининг тўртинчи уринишини аниқ йўллади.
Иккинчи бўлимда эса вазият кескин ўзгарди. Энди майдон эгалари ташаббусни қўлга олиб, пенальти орқали ҳисобни тенглаштиришди ва ўйин якунланиши арафасида ғалаба тўпини ҳам урди.
Биз учун муҳим жиҳати, ҳамюртимиз Абдуқодир Ҳусанов 85 дақиқа майдонда ҳаракат қилди ва бирорта хатога йўл қўймади. Энг қизиғи, «Брайтон»нинг иккинчи голи айнан у захирага олинганидан сўнг киритилди.
Учрашувдан кейин Хосеп Гвардиола жамоа ўйини ҳақида фикр билдирди:
— Мен кўп нарсадан мамнунман. «Тоттенҳэм»га қарши учрашувни ҳам яхши бошлаган эдик, бу гал ҳам шундай бўлди. Бироқ ғалабага эришолмадик. Гол ўтказиб юборгунга қадар барча ишларимиз яхши кечаётганди. Имкониятларимиз ҳам бўлди, бир соат жуда юқори даражада ҳаракат қилдик. Аммо қолган вақтда тўлиқ йўқолиб қолдик. Яқин паслар ўрнига узоқ тўплар билан ҳужум қилишга уриниш жамоага ёрдам бермади. Бу борада ҳали кўп иш қилишимиз керак.
Мутахассис шунингдек, мавсум ҳали янги бошланганини ва совринлар учун курашиш ҳақида гапириш эрта эканини таъкидлади.
«Манчестер Сити» ўзининг навбатдаги учрашувини 13 сентябрь куни ўз майдонида «Манчестер Юнайтед»га қарши ўтказади.
«Замин»ни Telegram’да ўқинг!
