Англия Премьер-лигасида кузатилган энг қизиқ трансфер мавзуларидан бири якунланди. The Athletic тарқатган маълумотга кўра, «Кристал Пэлас» ҳимоячиси Марк Геҳи «Ливерпул»га кўчиб ўтмайди ва ҳозирча ўз жамоасида қолади.
Маълум бўлишича, марказий ҳимоячи «Ливерпул» билан келишув жараёнини бошлаб, ҳатто тиббий кўрикнинг муайян босқичидан ҳам ўтган эди. Бироқ барча мухлислар кутган трансфер амалга ошмай қолди.
Бу қарор ортида эса асосий омил сифатида «Кристал Пэлас» бош мураббийи Оливер Гласнернинг қатъий позицияси туради. Унинг сўзларига кўра, жамоа етакчиларидан бири саналган Геҳини ҳозирча клубдан чиқариб юбориш мумкин эмас. Сардор ўрнига муносиб ва ишончли муқобил топилмагунча, ҳимоячининг кетиши масаласи умуман кўриб чиқилмайди.
Шу билан бирга, «Пэлас»нинг «Брайтон» сафидан Игор Жулиони сотиб олиш режаси амалга ошмади. Агар ушбу битим бажарилганида, Геҳининг «Ливерпул»га ўтиши эҳтимоли юқори бўлар эди.
Эслатиб ўтамиз, ҳозирда 24 ёшли ҳимоячининг «бургутлар» билан тузган шартномаси келаси йил ёзгача амал қилади. Демак, унинг келажакдаги трансфери ҳақидаги саволлар яна бир мавсум давомида мухлисларни қизиқтириб туриши мумкин.
Шундай қилиб, «Ливерпул» мухлислари Марк Геҳини ҳозирча «Энфилд»да кўра олмайди, аммо у «Кристал Пэлас»нинг ҳимоя чизиғида яна бир мавсум муҳим роль ўйнаши кутилмоқда.
«Замин»ни Telegram’да ўқинг!
