2026 йилги U-23 Осиё кубоги саралаш босқичи “Е” гуруҳи баҳслари олдидан жамоаларнинг бош мураббийлари иштирокида матбуот анжумани ўтказилди.
Унда Ўзбекистон U-23 терма жамоаси устози Равшан Ҳайдаров ҳам қатнашиб, ўз қарашларини баҳам кўрди.
— Аввало, саралаш босқичи иштирокчиларини самимий қутлайман. Ушбу турнир юксак даражада ташкил этилишига ишончим комил. Умид қиламанки, барча ўйинлар мухлислар учун қизиқарли ва томошабоп тарзда кечади, ғалаба эса муносиб жамоага насиб этади, — деди мураббий.
Ҳайдаров Қирғизистон футбол иттифоқига ҳам алоҳида миннатдорлик билдирди:
— Бу ерда юқори савиядаги ташкилотчиликни кўрмоқдамиз. Жамоамиз ҳам белгиланган режа асосида пухта тайёргарликдан ўтди. Хозир футболчиларимиз мусобақага жисмоний ва маънавий жиҳатдан яхши ҳолатда кириб келди, — дея қўшимча қилди у.
Мураббий таркиб масаласига ҳам тўхталди:
— Ёшлар жамоаларидаги ўйинчилар учун бу босқич миллий жамоага кўтарилишда муҳим давр ҳисобланади. Айрим футболчиларимиз аллақачон асосий терма сафида майдонга туша бошлаган. Биз уларни яна U-23 жамоасига чақирмасликка ҳаракат қиламиз. Чунки асосий вазифамиз – миллий жамоага кучли ва иқтидорли футболчиларни етказиб бериш. Масалан, илгари ёшлар сафида ўйнаган Абдуқодир Ҳусанов ва Аббос Файзуллаев бугун миллий термада ўз ўрнига эга. Биз учун энг асосий мақсад — ёшларга имконият яратиб бериш, уларни катта футболга тайёрлашдир, — деди Ҳайдаров.
Эслатиб ўтамиз, Ўзбекистон U-23 терма жамоаси Бишкекда бўлиб ўтадиган саралаш баҳсларида майдонга тушади. Йигитларимиз 3 сентябрь куни Шри-Ланкага, 6 сентябрь куни Қирғизистонга ва 9 сентябрь куни Фаластинга қарши ўйнашади. Аввалроқ мураббий таркибни ҳам эълон қилган эди.
«Замин»ни Telegram’да ўқинг!
