Туркия футболида катта воқеа — машҳур немис яримҳимоячиси Илкай Гюндоган турк гранди “Галатасарой” таркибига қўшилди.
34 ёшли тажрибали футболчи клуб билан 2027 йил ёзигача мўлжалланган шартнома имзолади. “Галатасарой” расмий равишда “Манчестер Сити” Илкайни эркин агент сифатида қўйиб юборганини эълон қилди. Янги шартнома шартларига кўра, Истанбулда Гюндоган солиқлар чиқарилгандан кейин йилига тахминан 4,5 миллион евро маош олади.
Гюндоганнинг фаолияти “Сити” билан икки босқичда узоқ йиллар давом этди (2016–2023 ва 2024–2025). Бу вақт мобайнида у жамоа билан 14 та совринни қўлга киритди. Улар орасида Англия Премьер-лигасида беш карра чемпионлик ва бир марта Чемпионлар Лигаси ғалабаси алоҳида эътиборга молик.
Немис юлдузи “шаҳарликлар” сафида барча турнирларда жами 358 марта майдонга тушиб, рақиблар дарвозасига 65 та тўп киритишга муваффақ бўлди.
Илкайнинг Туркияга йўли катта қизиқиш уйғотди. Ҳозирнинг ўзидаёқ мухлислар ундан янги чемпионатда ёрқин ўйинлар ва катта натижалар кутишмоқда.
«Замин»ни Telegram’да ўқинг!
