CAFA Nations Cup’нинг 2-туридан ўрин олган Туркманистон – Ўзбекистон (1:2) баҳсидан сўнг терма жамоа футболчиси Диёр Холматов журналистлар саволларига жавоб қайтарди.
– Учрашув ҳақиқатан ҳам жуда мароқли ва бир вақтнинг ўзида оғир ўтди. Энг муҳими – ғалабага эришдик. Энди эътиборимизни кейинги беллашувга қаратамиз, – деди у.
Футболчи ҳисоб йирикроқ бўлиши мумкинлиги ҳақида ҳам тўхталди:
– Бир киши кам ўйнаганимиз сабаб вазиятлар сони қисқарди. Бир футболчи кам бўлса, чарчоқ кўпроқ сезилади ва имкониятлар ҳам шунга яраша камаяди, – дея таъкидлади Холматов.
Бош соврин учун курашда биринчи ўрин масаласи ҳақида у шундай фикр билдирди:
– Худо хоҳласа, учинчи ўйинда ҳам ғалаба қозонамиз. Бизга бу босқичда фақат ғалаба керак, – деди футболчи ишонч билан.
Шахсий ўйини ҳақида сўралганда эса у кулимсираб жавоб берди:
– Бугун қандай ўйнаганимни дадамдан сўрайман, – деди у ҳазил билан.
Терма жамоанинг янги либослари ҳақида ҳам ўз фикрини билдириб ўтди:
– Янги бренддаги формалар жуда яхши, сифати юқори даражада. Ижобий ҳиссиёт қолдиради, жуда қулай, – деди Холматов.
Сўнгра янги барпо этилган стадион ҳақида ҳам тўхталиб ўтди:
– Янги стадион ҳолати ҳақиқатан ҳам яхши. Энди асосийси – унда футбол ўйнаш ва мухлисларга шодлик улашиш, – дея фикрини якунлади у.
Манба: championat.asia
«Замин»ни Telegram’да ўқинг!
