Италия миллий терма жамоасининг асосий посбони Жанлуижи Доннарумма ўзининг «Манчестер Сити»га ўтишига оид фикрлари билан ўртоқлашди. Ундан аввалроқ маълум бўлганидек, у Франциянинг «ПСЖ» клубини тарк этиб, «шаҳарликлар» сафидан жой олган эди.
Дарвозабон ўз сўзларида бу қарорини катта ҳаяжон ва қониқиш билан қабул қилганини таъкидлади:
«Мен учун “Ман Сити”га ўтиш орзу эди. Чунки улар мени жамоада кўришга қаттиқ иштиёқ билан интилишди. Айниқса, Пеп Гвардиоланинг хоҳиши мени янада руҳлантирди. Бундай нуфузли клубда тўп суриш катта шараф. Ростини айтсам, мен ўзимни бахтли ҳис қиляпман.
“ПСЖ” президенти билан суҳбатда шартнома имзолашга розилик олишим мумкинлигини сўрадим ва омад мени қўллаб-қувватлади. Шундай экан, хотиржамман: агар сени «Ман Сити»дек жамоа қидирса ва ўз сафида кўришни истаса, бу сенинг меҳнатингнинг қадрланишидир. Гвардиола каби мураббий сенга ишонч билдирса, буни сўз билан ифода қилиш қийин», — деди Доннарумма.
Маълумот учун, «Манчестер Сити» дарвозабонни «ПСЖ»дан 30 миллион евро эвазига харид қилди. Томонлар ўртасидаги келишув 2030 йилга қадар амал қиладиган шартнома билан мустаҳкамланган.
«Замин»ни Telegram’да ўқинг!
