Хабарингиз бўлса керак, бугун Англиянинг машҳур Ливерпуль шаҳрида катталар ўртасидаги бокс бўйича Жаҳон чемпионати қизғин тарзда давом этмоқда. Турнирда юртимиз номидан қатнашиб келаётган чарм қўлқоп усталари мухлисларга кутилганидан ҳам завқли жангларни тақдим этмоқда.
Шу кунги баҳсларда -90 кг вазн тоифасида қатнашаётган Тўрабек Хабибуллаев рингга кўтарилиб, ўзининг куч-қуввати ва маҳоратини ёрқин намоён этди. Унинг рақиби Греция вакили Вагкан Нанитзаниан бўлди. Жангда уч раунд давомида барча мезонлар бўйича устунликни қўлга киритган боксчимиз ҳакамларнинг бир овоздан чиқарган қарорига кўра 5:0 ҳисобида ишончли ғалаба қозонди.
Шу натижа орқали Тўрабек чорак финалга йўл олиш шарафига муяссар бўлди. Энди унинг кейинги рақиби қудратли бокс мактаби билан танилган Қозоғистон спортчиси Сағиндик Тоғамбай бўлади. Бу баҳс нафақат икки ёш иқтидорнинг тўқнашуви, балки турнирнинг энг кутилган учрашувларидан бири сифатида эътибор марказида туриши кутилмоқда.
Ўзбекистон бокс федерацияси тарқатган хабарга кўра, делегациямизда кайфият баланд, барча боксчиларимиз кейинги босқич учун жиддий тайёргарлик кўрмоқда.
Эслатиб ўтамиз, бугун яна бир қатор ҳамюртимиз ҳам рингга кўтарилади. Хусусан, юртимизнинг номдор боксчиларидан бири Навбаҳор Ҳамидова Белгия вакили Ошин Дериеувга қарши жангда ўз маҳоратни кўрсатади. Ушбу тўқнашув ҳам мухлислар томонидан катта қизиқиш билан кутилмоқда.
Шу тариқа, Ливерпул мезбонлик қилаётган бокс бўйича жаҳон чемпионати юртимиз вакиллари учун омадли бошланди ва мухлислар бундан кейинги баҳсларда ҳам янги ғалабалар кутмоқда.
«Замин»ни Telegram’да ўқинг!
