Мадриднинг машҳур клуби «Реал» жамоаси бош мураббийи Хаби Алонсо Испания чемпионати – Ла Лигада ўтган ойнинг энг яхши мураббийи сифатида эътироф этилди. Бу ҳақда лига матбуот хизмати маълум қилди.
43 ёшли испаниялик мутахассис махсус сўровнома орқали белгиланган танловда рақиблари — Эрнесто Вальверде («Атлетик») ва Маноло Гонсалес («Эспаньол») устидан юқори натижа қайд этиб, ғолиб бўлди.
Эслатиб ўтамиз, Алонсо 2025 йилнинг 1 июнидан буён «Реал Мадрид» жамоасини бошқариб келмоқда. Унинг қўл остида жамоа Ла Лиганинг август ойидаги барча 3 учрашувида майдонга тушиб, барчасида ғалаба қозонди.
Хусусан, мадридликлар «Осасуна»га қарши баҳсда (1:0) минимал ҳисобдаги муҳим ғалабани қўлга киритишди, «Оьведо» жамоасига қарши баҳсда (3:0) ишончли ҳисоб билан зафар қучишди ҳамда «Мальорка» устидан (2:1) кучли ирода ҳисоби билан устун келишди.
Натижада, 3 турдан сўнг «Реал» Испания чемпионатида етакчилар қаторидан жой олди ва «Атлетик» клуби билан биргаликда пешқадамликни бўлишиб турибди.
Мутахассислар таъкидлашича, Хаби Алонсо жамоага янги нафас бағишлаган мураббий сифатида ўзини кўрсатмоқда. Унинг тактик қарашлари ва майдондаги қарорлари «Реал» футболчилари ўйинида сезиларли ўзгаришлар яратди. Мухлислар эса ёш мураббийдан кейинги турларда ҳам шундай самарадорликни давом эттиришни кутмоқдалар.
Хаби Алонсо «Реал» клубидаги илк ойларидаёқ ёрқин натижаларга эришиб, Ла Лиганинг ой мураббийи сифатида тақдирланди. Бу эса унинг мураббийлик йўлидаги катта қадамларидан бири бўлиб, мадридликлар учун янги умид ва кутилмаларни юзага келтирди.
«Замин»ни Telegram’да ўқинг!
