Ла Лиганинг янги мавсуми қизғин паллага кириб бормоқда ва мухлисларни энг кўп қизиқтираётган саволлардан бири – чемпион ким бўлиши мумкинлиги. “CIES Football Observatory” томонидан тақдим этилган сўнгги тахминларга кўра, Ла Лигада чемпионлик учун энг юқори эҳтимол Мадриднинг машҳур клуби – “Реал Мадрид”га тегишли.
Таҳлилчиларнинг хулосасига кўра, “қироллик клуби”нинг чемпионлик имконияти 40 фоиздан ортиқроқ кўрсаткичга эга. Бу ҳолат “Реал”нинг мавсумдаги барқарор ҳаракати ва кучли таркиби билан боғланмоқда.
Иккинчи ўринда эса “Барселона” жой олган. Каталония клубининг чемпионлик эҳтимоли 29,6 фоизга баҳоланмоқда. Демак, Флик шогирдлари ҳам мавсум охиригача жиддий рақобат қила олиши мумкин.
“Атлетико Мадрид” эса 22,1 фоизлик имконият билан учинчи ўринда қайд этилди. Диего Симеоне қўл остидаги жамоа ҳар доим курашчанлиги ва интизоми билан танилган, шу боис улар ҳам чемпионлик пойгасидан четда қолмаслиги аниқ.
Шу тариқа, Ла Лиганинг бу мавсуми анъанавий тарзда “Реал”, “Барселона” ва “Атлетико” ўртасида қизғин баҳсларга бой бўлиши кутилмоқда. Мухлислар эса ҳар бир турни катта қизиқиш билан кутиб олиши тайин.
«Замин»ни Telegram’да ўқинг!
