2027 йилги УЕФА Чемпионлар Лигаси финал беллашуви ўтказиладиган стадион номи расман маълум бўлди. Бу ҳақда Испаниянинг нуфузли "Cope" нашри маълумот тарқатди.
Манбаларга кўра, Европанинг энг нуфузли клуб мусобақасининг ҳал қилувчи баҳси Мадрид шаҳрида жойлашган ва "Атлетико" клубининг уй майдони ҳисобланадиган "Рияд Эйр Метрополитано" стадионида ташкил этилади.
Маълумот учун, финални ўтказиш ҳуқуқи учун Боку шаҳридаги катта стадион ҳам даъвогарлик қилган. Бироқ якуний қарор Испания пойтахти Мадрид фойдасига қабул қилинди. Бу қарор билан УЕФА ушбу йирик мусобақанинг финалини яна бир бор Европанинг энг катта футбол марказларидан бирига олиб келди.
Эслатиб ўтамиз, Чемпионлар Лигасининг 2025/2026 йилги мавсуми финал учрашуви Венгрия пойтахти Будапештдаги машҳур "Ференц Пушкаш" стадионида бўлиб ўтади.
Шунингдек, турнирнинг амалдаги чемпионлиги Франциянинг ПСЖ жамоасига тегишли. Париж клуби ўтган мавсум финалида Италиянинг "Интер" жамоасига қарши ўйинда мутлақ устунлик кўрсатиб, 5:0 ҳисобида ғалаба қозонган эди.
«Замин»ни Telegram’да ўқинг!
