Ўзбекистон миллий терма жамоаси октябрь ойида яна бир муҳим синовга тайёрланмоқда. ФИФА кунларидан унумли фойдаланиш мақсадида терма жамоамиз Малайзияда ўртоқлик учрашувида майдонга тушади. Бу сафар рақиб сифатида Жанубий Американинг кучли ва нуфузли жамоаларидан бири — Уругвай терма жамоаси билан тўқнашув кутилмоқда.
Икки жамоа келаси йил бўлиб ўтадиган Жаҳон чемпионати саралаш баҳсларига жиддий тайёргарлик кўраётгани боис, бу ўйин ҳар икки тараф учун ҳам катта аҳамиятга эга.
Ўзбекистон футбол ассоциацияси матбуот хизмати маълумотига кўра, кеча Малайзияда ўйинга оид ташкилий масалалар юзасидан ишчи учрашув ўтказилди. Унда ўйин вақти ва жойи аниқлаштирилди. Шу билан, Ўзбекистон — Уругвай ўртоқлик баҳси 13 октябрь куни Тошкент вақти билан 17:45 да старт олади. Маҳаллий вақт билан эса беллашув соат 20:45 да бошланади.
Малака шаҳрида жойлашган «Ҳанг Жебат» стадионида ўтадиган учрашувда терма жамоамиз янги тактик усулларни синаб кўради, шу билан бирга, ёш футболчилар учун ҳам катта тажриба майдони бўлади.
Шунингдек, Ўзбекистон учун бу ўйин нафақат ЖЧ саралашига тайёргарлик, балки дунё футболидаги юқори рақиблардан бирига қарши куч синови сифатида ҳам катта аҳамиятга эга бўлиши кутилмоқда.
Мухлислар учун эса 13 октябрь кунги баҳс узоқ вақт эсда қоладиган спорт байрамига айланиши шубҳасиз.
«Замин»ни Telegram’да ўқинг!
