Бразилия миллий терма жамоасини 2026 йилги жаҳон чемпионатига тайёрлаётган тажрибали италиялик мутахассис Карло Анчелотти келгусидаги режалари ҳақида очиқ баёнот берди.
Анчелоттининг таъкидлашича, Бразилия сафаридан кейин у фақат битта клубда фаолият юритиши мумкин — бу эса Мадриднинг машҳур “Реал” жамоаси ҳисобланади.
– Бразилия терма жамоасидан кейин мен фақат битта клубда ишлашга рози бўламан. Бу клуб — “Реал”, – деди 66 ёшли мутахассис.
Карло Анчелотти Мадрид клубини икки маротаба бошқарган. Илк бор 2013–2015 йилларда жамоани қўлга олган бўлса, кейинчалик 2021 йилдан 2025 йилгача “қироллик клуби” билан катта муваффақиятларга эришган.
Айнан унинг қўл остида “Реал” футболчилари уч марта Европа Чемпионлар лигасини ютиб, халқаро майдонда ўз нуфузини янада мустаҳкамлади. Шунингдек, жамоа икки мартадан Испания чемпионати ва мамлакат кубогини қўлга киритди, УЕФА Суперкубоги ва Испания Суперкубогида ҳам ғолиб бўлди.
Анчелоттининг бу каби баёноти унинг келажакда яна Мадридга қайтиб, “Реал” сафида янги тарих ёзиш истаги борлигидан дарак бермоқда.
«Замин»ни Telegram’да ўқинг!
