Бразилия миллий терма жамоасини 2026 йилги жаҳон чемпионатига тайёрлаётган машҳур италиялик мутахассис Карло Анчелотти ўзининг узоқ йиллар давомида тўплаган тажрибаси ва шогирдлари ҳақида фикр билдирди. Унинг сўзларига кўра, фаолияти давомида ишлатган энг нуфузли ва жаҳон даражасидаги футболчилар рўйхати анча бой.
“Мен бош мураббий сифатида ишлаш давомида жуда кўп истеъдодли ўйинчилар билан ҳамкорлик қилдим. Лекин энг ёрқинлар қаторига Роналдо, Криштиану Роналду, Кака, Тони Кроос, Винисиус Жуниор, Лука Модрич ҳамда Дидье Дрогбани қўйишим мумкин. Улар ҳақиқий майдон усталари эди”, — деди Анчелотти ўз баёнотида.
66 ёшли тажрибали мураббийнинг фаолияти Европа футболидаги энг нуфузли клублар билан чамбарчас боғлиқ. У “Ювентус”, “Милан”, “Наполи”, “Челси”, “Эвертон”, “Пари Сен-Жермен”, “Бавария” ҳамда “Реал Мадрид” клубларида ишлаган ва ҳар бир жамоада ўз изини қолдирган.
Анчелотти фаолияти давомида жами 31 та турли соврин ва кубокларни қўлга киритди. Бу кўрсаткич уни замонавий футболнинг энг муваффақиятли мураббийларидан бири сифатида намоён қилади. Унинг раҳбарлигида жамоалар миллий чемпионатлардан тортиб халқаро турнирларгача бир қатор юксак натижаларга эришишди.
Ўтган ёзда “Реал” клубидаги лавозимини топширган Анчелотти янги чақириқ сифатида Бразилия миллий терма жамоаси билан ишлашни маъқул топди. Ҳозир у янги авлод футболчилари билан ишлаб, уларни 2026 йилги Жаҳон чемпионатида муваффақият қозонишга тайёрламоқда.
Мутасаддилар фикрича, Анчелоттининг катта тажрибаси ва машҳур футболчилар билан ишлаган маҳоратлари бразилияликларга катта туртки бериши мумкин. Мухлислар эса унинг қўл остида янги совринли саҳифалар яратилишига ишонч билан қарамоқда.
«Замин»ни Telegram’да ўқинг!
