Европа Чемпионлар лигаси умумий босқичининг биринчи туридан ўрин олган кескин баҳсда “Реал Мадрид” ўз майдонида “Марсель”га қарши майдонга тушди. Жуда драматик кечган тўқнашувда мадридликлар 2:1 ҳисобида зафар қозонишди, аммо ғалаба жамоа учун катта йўқотишлар билан кечди.
Учрашувнинг илк дақиқалариёқ мадридликлар учун нохуш вазият юз берди. Жамоа таркибига ёзда қўшилган англиялик ҳимоячи Трент Александр-Арнольд бор-йўғи бешинчи дақиқадаёқ жароҳат олиб, ўрнини Дани Карвахалга бўшатди. Карвахал иккинчи бўлимда қўпол ҳаракати учун тўғридан тўғри қизил карточка олиб, “Реал”ни бир киши кам бўлиб қолишга мажбур қилди.
Шу ўринда “Қироллик клуби” расмий тиббий хизмати футболчининг ҳолати юзасидан баёнот берди. Хабарда қайд этилишича, Александр-Арнольднинг чап оёғида, тизза ости мушаклари соҳасида жиддий шикаст аниқланган.
Расмий маълумотларга кўра, тажрибали ҳимоячининг тўлиқ майдонга қайтиши учун тахминан саккиз ҳафта вақт талаб этилади. Бу эса жамоа учун жиддий йўқотиш, чунки олдинда Чемпионлар Лигаси ва Ла Лиганинг энг масъулиятли баҳслари турибди.
Футбол мутахассислари бу йўқотиш “Реал” ҳимоя чизиғи учун катта муаммолар келтириши мумкинлигини таъкидлашмоқда. Айниқса, Карвахалнинг дисквалификацияси туфайли келгуси турларда асосий таркибда ким ўйнаши катта савол остида қолди.
Мухлислар эса, Александр-Арнольднинг тезроқ сафга қайтиши ва жамоанинг янада кучли таркиб билан майдонга тушишини интизорлик билан кутмоқда.
«Замин»ни Telegram’да ўқинг!
