«Манчестер Сити» устози Пеп Гвардиола жамоаси ҳақида гапирар экан, уни бу йилги Чемпионлар лигасининг асосий совриндорларидан бири сифатида кўрмаслигини таъкидлади. Эртага «шаҳарликлар» умумий босқичнинг илк турида Италия чемпиони «Наполи» билан тўқнаш келади.
Гвардиола журналистлар билан суҳбатда ўз фикрларини очиқ баён қилди:
— Биз ўзимизни турнирнинг етакчи даъвогарлари сифатида кўрмаяпмиз. Бизнинг асосий мақсадимиз — ҳар бир ўйиндан завқ олиш ва бу мусобақада қатнашишдан хурсанд бўлиш. Эртага бўладиган баҳс ҳам, турнирнинг бошланиши ҳам биз учун жуда муҳим.
Тажрибали мураббий шунингдек мавсум тақвими янада зичлашганини ҳам қайд этди:
— Бу йилги ўйинлар сони олдинги мавсумлардан кўпроқ. Агар биринчи қадамдаёқ ёмон натижа қайд этсак, кейинги босқичларда қийинчиликлар бўлиши аниқ. Эсингизда бўлса, ўтган мавсумда биринчи турда «Интер»га қарши дуранг қайд этгандик. Бу сафар эса, умид қиламанки, натижаларимиз яхшироқ бўлади, — деди Гвардиола.
Шу тариқа, «Манчестер Сити»нинг машҳур мураббийи ўз жамоасига босимни камайтиришга ҳаракат қилмоқда. Аммо «шаҳарликлар»нинг Европа майдонида қандай натижа кўрсатиши, албатта, футбол ишқибозлари учун катта қизиқиш уйғотмоқда.
«Замин»ни Telegram’да ўқинг!
