“Манчестер Сити” сўнгги икки трансфер ойнаси давомида таркибини кескин янгилади. Бир қатор тажрибали ўйинчилар клубни тарк этар экан, уларнинг ўрнини кўплаб янги футболчилар эгаллади.
Шу билан бирга, Хосеп Гвардиола таркиб билан боғлиқ барча муаммоларни тўлиқ бартараф эта олгани йўқ. Ҳимоядан то ҳужум чизиғигача кўплаб янгиликлар киритилган бўлса-да, жамоанинг асосий дардли нуқтаси ҳимоянинг ўнг қаноти бўлиб қолмоқда.
Мавсум бошидан бу позицияда Рико Льюис, Матеуш Нуньеш ва ўзбек легионери Абдуқодир Ҳусанов синовдан ўтди. Улар орасида ишончни оқлаган ва мухлислар эътирофига сазовор бўлгани айнан Ҳусанов бўлди. Марказий ҳимоячи сифатида танилган Абдуқодир дербида “Манчестер Юнайтед”га қарши ўнг қанотни мустаҳкам ёпди ва учрашувнинг энг яхши ўйинчиларидан бири сифатида баҳоланди.
Нуфузли cityxtra.co.uk нашри экспертлари ҳам “Сити” таркибидаги асосий муаммолар ва ечимлар ҳақида сўз юритиб, Гвардиоланинг ёш ҳимоячи ҳақидаги фикрларига тўхталиб ўтишди. Испаниялик мураббийнинг таъкидлашича, Ҳусановнинг универсаллиги ва жисмоний тайёргарлиги юқори баҳоланса-да, унга мунтазам равишда ўнг қанотни ишониб топшириш қийин вазифа.
“Биз ҳар уч кунда ўйнаймиз, бунақа жадвални ҳеч бир футболчи доимий кўтара олмайди. Ҳусанов ўз куч-қуввати ва тезлиги билан қанотни ёпди, жуда ҳам яхши ҳаракат қилди. Бироқ бундай позицияда фақат битта ўйинчига суяниш хавфли”, – деди Гвардиола.
Шу билан бирга, “Сити” янги трансфер ойнасида тажрибали ўнг қанот ҳимоячиларини қўшиш режасини кўриб чиқмоқда. Айни пайтда “Интер” футболчиси Дензел Дюмфрис ва “Ньюкасл”дан Тино Ливраменто номзод сифатида тилга олинмоқда.
Шу билан бирга, Абдуқодир Ҳусанов клуб учун жуда муҳим шахс бўлиб қолмоқда. У ҳимоя марказида ҳам, қанотларда ҳам ишончли ўйин кўрсата олади ва таркиб ротациясида катта аҳамиятга эга футболчи сифатида қайд этилмоқда.
Мухлислар эса ҳозирнинг ўзида ўзбек легионерининг келгуси ўйинларда ҳам асосий таркибда чиқишини интиқлик билан кутмоқда.
“Zamin”ни Telegram'да ўқинг!
