Ўзбекистон терма жамоасининг собиқ устози, дунё футболида яхши танилган аргентиналик мутахассис Эктор Купер Лионель Месси билан боғлиқ қизиқарли хотираси билан ўртоқлашди. Унинг сўзлари футбол ишқибозлари орасида катта қизиқиш уйғотди.
Купер ўз вақтида Испания Ла Лиганинг турли клубларида ишлаган. Хусусан, “Расинг”да фаолият олиб борган пайтларидан бири ҳақида тўхталар экан, у Мессининг қай даражада ноёб футболчи эканини яна бир бор таъкидлади.
“Расинг”да ишлаган давримда “Барселона”га қарши ўйиндан олдин бутун ҳафта давомида футболчиларимни фақат битта нарсага тайёрладим: Мессининг чап оёғини тўсиш. Ҳаммага такрор ва такрор айтдим: агар у сизга рўбарў келса, чап оёғини ишлатишига йўл қўйманг, керак бўлса, ўнгини ишга солсин”, – дейди Купер.
Бироқ натижа кутилгандек бўлмаган. Афсонавий Лео ўйинда чап оёғини эмас, айнан ўнг оёғини ишга солди ва икки гол киритди. Купернинг сўзларига кўра, бу воқеа унга Мессининг футболдаги универсаллиги ва истеъдодини яна бир бор кўрсатиб берган.
“Мен ўйладимки, унинг асосий кучли томони чап оёғи, аммо у истаган пайтда ўнг оёғи билан ҳам ҳал қилувчи гол уриши мумкинлигини намойиш этди. Шу кундан сўнг Мессини йўқотишнинг деярли иложи йўқлигини тушундим”, – дея қўшимча қилди аргентиналик мураббий.
Купернинг бу ёдга олган хотираси Мессининг футболи қандай ноёб ва тахмин қилиб бўлмас даражада эканини яна бир бор намоён этди. Бу ҳикоя футбол тарихидаги энг кучли ҳужумчилардан бири бўлган Лионель Мессининг универсаллиги ва ғайриоддий маҳоратини янада ёрқинлаштирди.
«Замин»ни Telegram’да ўқинг!
