Англия Премьер-лигасининг 5-туридан ўрин олган энг марказий тўқнашув – “Олд Траффорд”даги “Манчестер Юнайтед” ва “Челси” ўйини том маънода драматик ва қизғин руҳда кечди. Рубен Аморим шогирдлари кўпчилик томонидан интизорлик билан кутилган баҳсда 2:1 ҳисобида зафар қозониб, мухлисларини қувонтиришди.
Учрашувнинг илк дақиқалариданоқ воқеалар шиддат билан ривожланди. Бешинчи дақиқадаёқ “Челси” посбони Роберт Санчес қоидабузарликка йўл қўйиб, тўғридан-тўғри қизил карточка олди ва лондонликлар майдонда камчиликда қолишди. Бу ҳолат манкунианликларга катта устунлик берди. Орадан 9 дақиқа ўтиб, жамоа сардори Бруну Фернандеш узоқдан йўллаган кучли зарбаси билан ҳисобни очди.
Биринчи бўлимнинг ўттиз еттинчи дақиқасида эса “Реал Мадрид”нинг собиқ ярим ҳимоячиси Каземиро ҳисобни 2:0 қилди. Бразилиялик футболчи голдан бироз ўтмай иккинчи сариқ карточка олиб, майдонни тарк этишга мажбур бўлди. Бу эса ўйиннинг динамикасига янада кескинлик қўшди.
Иккинчи таймда “Челси” қарши ҳужумларга ўтиб, гол уриш имкониятларини излай бошлади. 80-дақиқада ҳимоячи Тревор Чалоба боши билан аниқ зарба йўллаб, ҳисобни қисқартирди. Аммо қолган вақтда “аристократлар” яна бир гол ура олишмади ва ўйин 2:1 ҳисобида “қизил иблислар” фойдасига якунланди.
АПЛ. 5-тур, 20 сентябр
МЮ — Челси 2:1
Голлар: Фернандеш 14, Каземиро 37 — Чалоба 80.
Манчестер Юнайтед: Байиндер — Де Лигт, Магуайр (Йоро, 70), Шоу — Мазрауи (Кунья, 65), Каземиро, Фернандеш (Мейну, 87), Доргу — Мбемо (Маунт, 69), Диалло — Шешко (Угарте, 46).
Челси: Санчес — Джеймс, Фофана (Гюсто, 64), Чалоба, Кукурелья (Жорж, 64) — Фернандес, Кайседо — Нету (Адарабиойо, 7), Палмер (Сантос, 21), Эстевао (Йоргенсен, 6) — Педро.
Огоҳлантиришлар: Каземиро (17) — Кукуреля (44), Фернандес (48), Чалоба (50), Жорж (72), Адарабиойо (90+6).
Четлатишлар: Каземиро (45+5) — Санчес (5).
Бу ғалабадан кейин “Манчестер Юнайтед” жамоаси 7 очко жамғариб, онлайн турнир жадвалида 9-ўринга кўтарилди. “Челси” эса 8 очко билан 6-поғонада қолди.
Мазкур беллашув нафақат ҳисоб билан, балки қизил карточкалар ва жароҳатлар сони билан ҳам мухлисларни эсдан чиқмас таассуротларда қолдирди. Ҳар икки жамоа ҳам охирги дақиқаларгача тиш-тирноғи билан курашди. Бу баҳс Премьер-лига тури марказий тўқнашуви сифатида ўз номига муносиб тарзда тарихда қолди.
«Замин»ни Telegram’да ўқинг!
