Суперлиганинг 22-туридан ўрин олган "Қизилқум" – "Насаф" (0:1) учрашувидан кейин қаршиликлар бош мураббийи Рўзиқул Бердиев матбуот анжуманида ўйин ҳақидаги фикрлари билан ўртоқлашди.
Бердиевнинг таъкидлашича, баҳс кўпчилик кутганидек мазмунли ва самарали кечмаган бўлиши мумкин. Аммо ҳар икки жамоанинг ғалаба учун интилиши ва майдондаги кураши шубҳасиз кўзга ташланган. "Майдон ҳолати жуда оғир эди, бу эса футбол сифатига катта таъсир қилди. Майдонга масъул шахслар буни инобатга олиб, чора кўришлари зарур," – деди мураббий.
Унинг сўзларига кўра, "Насаф" футболчиларига кечаги машғулотдаёқ оддий ўйнаш, лекин натижага эришиш ҳақида уқтирилган. "Биз бугун узун узатмаларга таяндик. Муҳими – керакли уч очкони олдик. Бу ғалаба футболчиларимиз ва узоқ йўл босиб келган мухлисларимиз учун катта совға," – дея қўшимча қилди Бердиев.
Жамоанинг ўйини мазмун жиҳатидан етарли бўлмаганини тан олган мутахассис бу ҳолатни "Ал-Аҳли"га қарши сафар баҳсидан кейин куч йўқотилгани ва тикланишга эҳтиёж бўлгани билан изоҳлади. "Бугун биз учун услуб эмас, натижа муҳим эди. Шу боис, ўз услубимиздан вақтинча воз кечдик," – деди у.
Шу тариқа, "Насаф" қийин шароитда ҳам муҳим ғалабага эришиб, чемпионлик учун курашда очколар захирасини янада мустаҳкамлади.
«Замин»ни Telegram’да ўқинг!
