Ўзбекистонда спорт соҳасини кенг қамровда ривожлантириш, уни халқаро мезонларга мос равишда янги босқичга олиб чиқиш масаласи давлат даражасида устувор йўналиш сифатида белгиланган. Президент ташаббуси билан сўнгги йилларда хорижлик мутахассисларни мамлакатимизга жалб этиш, улар орқали тажриба алмашиш, спортчи ва мураббийларни тайёрлаш тизимини такомиллаштиришга алоҳида эътибор қаратилмоқда. Бу жараён миллий терма жамоаларнинг халқаро майдондаги нуфузини янада мустаҳкамлашда муҳим омил бўлиб хизмат қилмоқда.
Ҳозирги кунда турли йўналишлардаги спорт жамоаларида хориждан таклиф этилган мураббийлар муваффақиятли иш олиб боришмоқда. Амалиёт шуни кўрсатмоқдаки, бундай қадамлар юқори самарадорликка эришиш, миллий жамоаларимизнинг рақобатбардошлигини оширишда ўз самарасини бермоқда.
Шу мақсадда Ўзбекистон дзюдо федерацияси эркаклар терма жамоаси мураббийлар штаби янги аъзо билан тўлдирилди. Федерация раиси Азизжон Комилов ва россиялик мутахассис Камил Магомедов ўртасида расмий шартнома имзоланди. Бу келишув дзюдомиз тараққиёти йўлида яна бир муҳим қадам сифатида баҳоланмоқда.
Маълумотларга кўра, 44 ёшли Камил Магомедов ўз спортчилик фаолияти давомида -81 ва -90 килограмм вазн тоифаларида куч синашган. У 2012 йилда жамоавий жаҳон чемпионатида олтин медалга эга чиққан, уч карра Европа чемпионати совриндори бўлган. Шунингдек, Европа кубоги ва полиция ходимлари ўртасидаги жаҳон чемпионатида ҳам зафар қучган.
Бундай тажрибали мураббийнинг жалб этилиши миллий дзюдомизнинг ривожланишига катта ҳисса қўшиши табиий. Мутахассиснинг билим ва кўникмалари ёрдамида ёш спортчиларнинг маҳорат даражаси юксалиши, терма жамоамиз эса энг нуфузли халқаро мусобақаларда муносиб иштирок этиши кутилмоқда.
Ўзбекистон дзюдосидаги бу янгилик спорт ихлосмандларида катта қизиқиш уйғотди. Ҳаммадан муҳим жиҳати — миллий дзюдомиз келгусида жаҳон чемпионати ва Олимпиада каби йирик турнирларда муносиб натижалар кўрсатиши учун янги имкониятлар эшигини очмоқда.
«Замин»ни Telegram’да ўқинг!
