Футбол оламдаги энг нуфузли шахсий мукофот – 2025 йилги «Олтин тўп»нинг ғолиби аниқланди. Бу сафар соврин Париж Сен-Жермен ҳужумчиси ва Франция терма жамоаси етакчиларидан бири Усмон Дембелега топширилди. Франциялик юлдуз сўнгги мавсумдаги ўйинлари, майдондаги таъсирчан ҳаракатлари ва жамоасига қўшган улкан ҳиссаси билан мукофотга муносиб деб топилди.
Дембеле соврин учун олиб борилган курашда «Барселона»нинг ёш иқтидори Ламин Ямални орқада қолдирди. Ушбу қарор мухлислар ва футбол экспертлари орасида қизғин муҳокамага сабаб бўлди. Хусусан, Ла Лига президенти Хавьер Тебас бу ҳақида ўз фикрини билдириб ўтди.
— Агар Ламин Ямал ҳозир 23 ёшдан катта бўлганида, мен аниқ айтаманки, «Олтин тўп» унга берилар эди. Аммо ҳозирча ёши жуда кичик. Шу боис, унга бошқа махсус соврин топширилди. Лекин агар у шу даражада улкан маҳорат билан ўйнашни давом эттирса, яқин йилларда «Олтин тўп»ни қўлга киритиши муқаррар. Бунинг бўлишига ҳеч шубҳа йўқ, — деди Тебас.
Эслатиб ўтамиз, 18 ёшли Ямал бу йил ҳам мавсумнинг энг яхши ёш футболчисига бериладиган совринни олди. Бу эса унинг Европадаги энг иқтидорли ва келажаги буюк футболчилардан бири сифатида тан олинаётганини кўрсатади.
Шу тариқа, Усмон Дембеле шахсий ютуқларини янада бойитган бўлса, Ламин Ямал ҳам ёш бўлишига қарамай, жаҳон футболида катта қадамлар билан илгарилаб бораётганини яна бир бор исботлади. Мухлислар эса яқин йилларда унинг ҳақиқий «Олтин тўп» соҳибига айланишини интиқлик билан кутмоқда.
«Замин»ни Telegram’да ўқинг!
