Мадриднинг машҳур «Реал» клуби қишки трансферлар ойнаси очилиши олдидан таркибни қайта кўриб чиқиш ва оптималлаштириш борасида жиддий ишлар олиб боришга тайёргарлик кўрмоқда. Клуб раҳбариятида энг кўп муҳокамаларга сабаб бўлаётган масалалардан бири ёш бразилиялик ҳужумчи Эндрик тақдири бўлди.
Катта умидлар билан «бўлажак юлдуз» сифатида таклиф қилинган футболчи ҳозирча ишончни тўлиқ оқлай олгани йўқ. У Европа футболига ва «Реал»даги ички рақобатга тўлақонли мослаша олмаяпти. Бу эса мураббийлар штаби ва раҳбариятда унинг ривожланиши ҳақида турли фикр ва баҳсларни келтириб чиқармоқда.
Мадридлик мутахассислар ёш ҳужумчига мунтазам ўйин амалиёти зарурлигини таъкидлашмоқда. Шу боис клуб Эндрикни қишки трансферлар даврида ижарага жўнатиш масаласини кўриб чиқмоқда. Унга нисбатан катта босим мавжудлиги, футболчи ўз иқтидорини эркин намойиш қилиш имкониятини чеклаётгани қайд этилмоқда.
Испания оммавий ахборот воситаларига кўра, Ла Лиганинг бир нечта клуби ёш ҳужумчи билан ҳамкорликка қизиқиш билдирмоқда. Хусусан, «Севилья», «Сельта» ҳамда лигага янгидан қўшилган «Реал Овьедо» Эндрикни январда ўз таркибига қўшиб олиш ниятида экани айтилмоқда.
Шу тариқа, қишки трансферлар ойнаси Мадрид клуби учун нафақат таркибни кучайтириш, балки келажакка қаратилган йўналишни белгилашда ҳам муҳим синовга айланиши кутиляпти. Эндрикнинг кейинги манзили эса мухлислар ва футбол жамоатчилиги орасида катта қизиқиш уйғотмоқда.
“Zamin”ни Telegram'да ўқинг!
