Ўзбекистон миллий терма жамоасининг тажрибали ва ишончли ярим ҳимоячиларидан бири Отабек Шукуров ўзининг клуб карьерасини янги босқичга олиб чиқиш арафасида турибди. Олинган маълумотларга кўра, 29 ёшли футболчи БАА чемпионатида етакчилардан бири ҳисобланган «Ал Ваҳда» клуби билан музокараларни якуний босқичга етказмоқда.
Отабек Шукуров охирги мавсумда Саудия Арабистонининг «Ал Файҳа» клуби шарафини ҳимоя қилган эди. Бироқ ёзда унинг шартномаси ўз кучини йўқотди ва футболчи эркин агент мақомига эга бўлди. Шу вақтдан бери унинг номи турли клублар билан боғланиб келмоқда.
Маълумот ўрнида, БААнинг нуфузли жамоаларидан бири бўлган «Ал Ваҳда» чемпионат жадвалида 11 очко билан пешқадамликни қўлдан бермаяпти. Бу жамоа Осиё футболида ҳам ўз сўзини айта оладиган клуб сифатида танилган ва катта амбицияларга эга.
Аввалроқ хабар қилинганидек, Шукуровга Эроннинг машҳур клублари — «Персеполис» ва «Истиқлол»дан ҳам таклифлар тушганди. Бироқ футболчи уларнинг таклифини рад этиб, ўзининг келгуси йўлини БАА чемпионати билан боғлашни маъқул кўрди.
Ўзбекистон терма жамоаси сафида кўплаб муҳим ўйинларда майдонга тушган Отабек Шукуров тажрибаси ва майдондаги ҳаракатлари билан ҳар қандай жамоага катта фойда келтириши шубҳасиз. Энди эса унинг «Ал Ваҳда» сафида қандай ўйнашини бутун футбол жамоатчилиги катта қизиқиш билан кутмоқда.
«Замин»ни Telegram’да ўқинг!
