Европа футбол ассоциациялари иттифоқи (УЕФА) келаётган ҳафтада Исроилни турнирлардан чиқариш ёки унга рухсат бериш масаласи юзасидан ҳал қилувчи қарор қабул қилиши кутилмоқда. The Times нашрининг ёзишича, ижро қўмитаси аъзоларининг катта қисми санкцияларни қўллаб-қувватлаш тарафдори сифатида кўрилмоқда.
Нашр маълумотига кўра, бу ҳафта УЕФАда Исроил ҳаракатларига қандай муносабат билдириш ҳақида «юқори даражада жиддий муҳокамалар» бўлиб ўтган. Четлатишни талаб қилаётганлар 2022 йил Украинада уруш бошланганидан кейин Россия клублари ва миллий жамоаларига нисбатан қўлланилган тажрибани мисол сифатида келтиришмоқда.
Шу билан бирга, Israel Hayom газетаcи дипломатик босимлар, спорт раҳбарлари ва ҳатто «Америка расмийлари»нинг саъй-ҳаракатлари сабабли Исроилни УЕФА турнирларидан чиқариш масаласи кун тартибидан чиқарилгани ҳақида хабар тарқатган эди.
Аввалроқ БМТнинг Фаластин ҳудудлари бўйича махсус маърузачиси Франческа Албанезе УЕФАга мурожаат қилиб, Исроилни барча мусобақалардан четлатишни талаб қилганди. Шу билан бирга, The New York Times маълумотларига кўра, АҚШ Исроил терма жамоасини 2026 йилги жаҳон чемпионати саралашидан чиқариш уринишларини «тўлиқ тўхтатиш» ниятида ҳаракат қилмоқда.
Айни пайтда Исроил терма жамоаси саралашнинг I гуруҳида учинчи ўринда боряпти. Жамоа Италия билан бир хил — 9 очкодан тўплаган. Норвегия 15 очко билан етакчилик қилмоқда. Гуруҳ ғолиби тўғридан-тўғри жаҳон чемпионатига йўл олади, иккинчи ўрин эгаси эса кейинги босқичда иштирок этади.
«Замин»ни Telegram’да ўқинг!
