Португалия термасининг собиқ етакчи футболчиси Манише Криштиану Роналдунинг карьераси ва унинг тарихий мақсадлари ҳақида фикр билдирди. Унга кўра, Роналдуда 1000та гол уриш учун етарли куч-қувват, салоҳият ва профессионаллик мавжуд.
Манишенинг айтишича, ҳозирги пайтда Роналдуга ушбу рекордни ўрнатиш учун бор-йўғи 56та гол етишмайди. «Саудия Арабистони чемпионатида у бир мавсумда камида 30та гол уришга қодир. Демак, икки мавсум ичида у 1000та гол чегарасини забт этиши мумкин», – дейди собиқ ярим ҳимоячи.
Унинг фикрича, Саудия чемпионати Европанинг етакчи лигалари даражасида кучли эмас ва бу ҳолат Роналдунинг шахсий статистикаси учун қулай имконият яратади. «Роналду — профессионал футболчи. Унда интизом, ирода ва ҳеч нарсадан қайтмайдиган характер бор. Шу сабабли у учун иложсиз ишнинг ўзи йўқ», – дея қўшимча қилди Манише.
Маълумот учун, Роналду бугунги кунда дунё футболи тарихида энг кўп гол урган футболчилардан бири ҳисобланади. Унинг рекордлари ва иштиёқи ҳали-ҳануз барқарорлиги билан ҳайратга солмоқда. Агар Манишенинг тахмини рост бўлса, Роналду яқин икки мавсум ичида футбол тарихида мисли кўрилмаган ютуқка эришган илк футболчи сифатида тилга олиниши мумкин.
«Замин»ни Telegram’да ўқинг!
