Бугун Суперлиганинг 23-туридан ўрин олган жуда қизиқарли баҳсда «Андижон» ўз майдонида ОКМК жамоасини қабул қилади. Бу учрашув нафақат турнинг марказий тўқнашуви сифатида, балки икки машҳур мураббий — Максим Шацких ва Миржалол Қосимовнинг навбатдаги дуэли сифатида ҳам катта қизиқиш уйғотмоқда.
Футболимизда ўз номини қолдирган икки афсона бугун мураббий сифатида олтинчи марта ўзаро куч синашади. Илгари ўтказилган 5 учрашувда ҳар иккисида ҳам 2 тадан ғалаба бор, яна 1 баҳс дуранг билан якунланган. Шунинг учун ҳам бугунги беллашув уларнинг шахсий қарама-қаршилигида ҳал қилувчи аҳамият касб этиши мумкин.
Қизиғи шундаки, Максим Шацких аввалги барча беш тўқнашувда «Пахтакор» бош мураббийи сифатида иштирок этган эди. Энди эса у «Андижон» клуби устози сифатида илк марта ОКМКга қарши майдонга тушади. Мазкур ҳолат бугунги баҳсга янада интрига ва аҳамият бағишлайди.
Ўз навбатида, Миржалол Қосимов ҳам жамоасини яхши тайёргарлик билан майдонга олиб чиқишни мақсад қилган. Икки машҳур мураббийнинг ўйин услублари, тажрибаси ва тактик қарашлари бугун стадионда тўпланадиган мухлислар учун алоҳида завқ бағишлайди.
«Андижон» ва ОКМКнинг бугунги тўқнашуви нафақат тур очколари учун кураш, балки Шацких ва Қосимов ўртасидаги шахсий дуэлда қайси томон устун келишини аниқлаб берувчи ўйин сифатида ҳам мухлислар хотирасида қолиши аниқ.
«Замин»ни Telegram’да ўқинг!
